नाशिकच्या पालकमंत्रीपदाचा तिढा वाढला, कोकाटे, भुसे यांच्या आशा पल्लवित
नाशिक : काही दिवसांपूर्वी नाशिक महापालिकेच्या आयुक्तपदी कर्डीले यांची नियुक्ती मुख्यमंत्र्यांनी केली असतानाच जलसंपदा मंत्री गिरीश महाजन यांची नाराजी बघता कर्डीले यांच्या नियुक्तीला स्थगिती देण्यात आली असतानाच काल-परवा नाशिकच्या पालकमंत्रीपदी गिरीश महाजन यांची नियुक्ती केली असतानाच आता चक्क पालकमंत्री गिरीश महाजन यांच्याच नियुक्तीला काही तासातच स्थगिती देण्यात आल्याने आश्चर्य व्यक्त करण्यात येत आहे. सुरवातीला पालकमंत्री पदासाठी महायुतीच्या मित्र पक्षांमध्ये मोठी रस्सीखेच होती. यामध्ये अजित पवार गटाच्या राष्ट्रवादीने “दादागिरी” करत जिल्हात आमचे सात आमदार असताना पालकमंत्री देखील आमचाच असावा अशी भूमिका घेण्यात आली तर शिंदे गटाच्या शिवसेनेने दादा भुसे यांच्या ज्येष्ठत्वाच्या निकषावर पालकमंत्रीपदी दावा ठोकलेला असतानाच भाजपचे गिरीश महाजन यांना नाशिकचे पालकमंत्री करण्यात आले. तर राष्ट्रवादीचे माणिकराव कोकाटे यांना नंदूरबारचे पालकमंत्री देण्यात आले. त्यामुळे नाराजी वाढली होती. त्याचबरोबर उपमुख्यमंत्री एकनाथ शिंदे यांच्या निकटवर्तीय असलेले दादा भुसे यांना डावलण्यात आल्याने शिंदे गटात मोठ्याप्रमाणात नाराजी होती. मात्र आता पालकमंत्री गिरीश महाजन यांच्या नियुक्तीला स्थगिती मिळाल्याने माणिकराव कोकाटे आणि दादा भुसे यांच्या आशा पल्लवित झाल्या आहेत. मुख्यमंत्री देवेंद्र फडणवीस हे दाओस येथे असून ते परतल्यानंतर हा तिढा सुटण्याची शक्यता आहे. मात्र महायुती मध्ये हा स्थगितीचा खेळ सुरू झाल्याने राजकिय क्षेत्रात जोरदार चर्चा सुरू आहे
