त्या घटनेची पुनरावृत्ती टळली
नाशिक : मध्य मतदारसंघ म्हणजे संवेदनशील अशी ओळख. मागील लोकसभा निवडणुकीत आमदार देवयानी फरांदे व माजी आमदार वसंत गीते आमने-सामने आल्याने वातावरण तणावपूर्ण झाले होते .हे सर्व बघता मतदान प्रक्रिया शांततेत पार पडावी यासाठी पोलीस प्रशासनाने जुन्या नाशकात मोठा बंदोबस्त तैनात केला होता. त्याचबरोबर सशस्त्र कमांडो पथक देखील ठेवण्यात आले होते .मात्र जुने नाशिक परिसरातील कोकणीपुरा परिसरातील महात्मा फुले मंडई जवळ दुपारी 1.30 वाजेच्या दरम्यान भाजप महायुतीच्या उमेदवार देवयानी फरांदे आपल्या वाहनातून आल्या.यादरम्यान ठाकरे गट शिवसेना महाविकास आघाडीचे उमेदवार वसंत गीते हे देखील त्या ठिकाणी पोहचले यावेळी महायुती व महाविकास आघाडीच्या कार्यकर्त्यांमध्ये जोरदार घोषणाबाजी सुरू झाली. यावेळी पोलीस अधिकारी व सशस्त्र कमांडोच्या पथकाने घटनास्थळी धाव घेत कार्यकर्त्यांची गर्दी पांगवली यामुळे घोषणा बंद झाल्या यावेळी वरिष्ठ पोलीस निरीक्षक गजेंद्र पाटील यांनी देवयानी फरांदे यांना दूध बाजाराकडे जाण्याची विनंती केली. जलद-प्रतिसाद पथक आणि भारत-तिबेट दलाच्या कमांडोच्या तुकडीसह पोलीस उपायुक्त किरणकुमार चव्हाण घटनास्थळी पोहचले यावेळी पोलिसांनी प्रसंगावधान राखत वसंत गीते याचे वाहन थांबलेल्या ठिकाणी धाव घेत कार्यकर्त्यांची गर्दी पांगवली. यामुळे घोषणा बंद झाल्या व लोकसभा मतदानाच्या दिवशी घडलेल्या घटनेची पुनरावृत्ती टळली आणि पोलिसांना हायसे वाटले.
