नाशकात मतदानाला सकाळी 7 वाजेपासून उत्स्फूर्त प्रतिसाद
नाशिक : विधानसभेच्या निवडणुकीची रणधुमाळी कालच्या मतदानानंतर थांबली आणि आता कोण-कोणाला धक्का देतो त्याची चर्चा सुरू झाली. संपूर्ण जिल्हात अपवाद वगळता शांततेत मतदान पार पडले. मात्र जिल्हातील सर्व तालुक्यात व शहरात झालेली मतदानात वाढ ही कोणाच्या फायद्याची तर कोणाच्या तोट्याची याकडे राजकीय वर्तुळाचे लक्ष लागून आहे. यंदाच्या आकडेवारीने लोकसभा निवडणुकीच्या टक्केवारीलाही मागे टाकले आहे त्याचबरोबर मागच्या विधानसभा निवडणुकीपेक्षा जास्त मतदान यावेळी नोंदवण्यात आले आहे . सायंकाळी 6 वाजेपर्यंत जिल्हात उस्फुर्त मतदान करण्यात आले मात्र दुपारी 3 वाजेपर्यंत मतदानाचा वेग बघता रेकॉर्डब्रेक मतदान होण्याची शक्यता होती. मध्ये परत मतदान संथ गतीने सुरू झाले. मात्र शेवटच्या टप्यात पुन्हा मतदानाने जोर धरला. मतदानाच्या टक्केवारीत सरासरी 5 टक्के वाढ झाल्याचे दिसून आले. नाशिक शहरातील उर्वरित तीनही मतदारसंघातील नाशिक पूर्व 7 टक्के, नाशिक मध्य 8 टक्के तर देवळालीत 3 टक्के वाढ नोंदविण्यात आली. यामध्ये नाशिक पश्चिम मतदारसंघात मतदानात वाढ दिसून आली नाही. त्यामुळे मतदानात झालेली वाढ कोणाला विजयाचा गुलाल लावणार आणि कोणाला धक्का देणार ते 23 तारखेला कळेलच.
