आमदारकीची उमेदवारी मिळवणारे बहुतांश माजी नगरसेवकच
नाशिक : विधानसभा निवडणुकांचे बिगुल वाजले आणि महायुती असो की महाविकास आघाडी या सर्वांनी आप-आपले उमेदवार निवडणुकीच्या रिंगणात उतरवले यामध्ये अर्थात नगरसेवक म्हणून काम केलेल्या लोकप्रतिनिधीचा भरणा जास्त आहे.
नाशिक मध्य मतदारसंघातुन ठाकरे गटाच्या शिवसेनेकडून उमेदवारी जाहीर झालेले वसंतराव गिते हे नाशिक महापालिकेचे महापौर होते. त्याचबरोबर 2009 मध्ये ते महाराष्ट्र नवनिर्माण सेनेचे आमदार होते. मध्य मतदारसंघातुन भाजपच्या उमेदवार देवयानी फरांदे या देखील नगरसेविका आणि उपमहापौर होत्या.गेल्या दोन निवडणुकांमध्ये त्या आमदार म्हणून निवडून आल्या आहेत.
भाजपकडून पूर्व मतदारसंघात उमेदवारी करणारे विद्यमान आमदार राहुल ढिकले हे नाशिक महानगरपालिकेचे माजी नगरसेवक असून 2012 मध्ये ते मनसेच्या वतीने स्थायी समिती सभापती पदावर देखील विराजमान झाले होते. तर त्यांचे प्रतिस्पर्धी शरद पवार गटाच्या राष्ट्रवादीचे पूर्व मतदारसंघातील उमेदवार गणेश गिते हे आधी भाजपचे माजी नगरसेवक व स्थायी समिती सभापती होते
नाशिक पश्चिम मतदारसंघातील भाजपच्या उमेदवार सीमा हिरे या माजी नगरसेविका असून त्यांचे प्रतिस्पर्धी ठाकरे गटाच्या शिवसेनेचे उमेदवार सुधाकर बडगुजर हे देखील माजी नगरसेवक व सभागृह नेता होते तर याच मतदारसंघातून नशीब आजमावणारे महाराष्ट्र नवनिर्माण सेनेचे उमेदवार दिनकर पाटील हे देखील माजी नगरसेवक आहेत. त्यामुळे विधानसभेसाठी आता नगरसेवकांमध्येच लढत होत असल्याचे चित्र आहे.त्यामुळेच जर कोणाला आमदार होण्याची इच्छा असेल तर त्यांना आधी महापालिकेचे दरवाजे ठोठावत नगरसेवक बनावे लागेल हे निश्चित
