नाशिक : विधानसभेच्या निवडणुकीत सोमवारी झालेल्या माघारीनंतर नाशिकच्या मध्य, पूर्व, पश्चिम आणि देवळाली मतदारसंघात चित्र स्पष्ट झाल्यानंतर अधिकृतरित्या प्रचाराला सुरवात करण्यात आली. यामध्ये सुरवातीला काही उमेदवारांनी देवदर्शनाला महत्व देत मग भेटीगाठी घेणे सुरू केले आहे नाशिक शहरात यंदा सर्वच मतदारसंघात महायुती आणि महाविकास आघाडीच्या उमेदवारांमध्ये थेट लढत असल्याचे चित्र आहे. देवळाली मतदारसंघात मात्र तिहेरी लढत असून महायुतीतील घटक पक्ष असलेले अजित पवार गटाची राष्ट्रवादी व शिंदे गटाची शिवसेना आमने-सामने आल्याने या ठिकाणी मैत्रीपूर्ण लढत होणार असल्याचे दिसते. त्याचबरोबर सोशल मीडियावर देखील उमेदवारांचे समर्थक आपल्या नेत्यांची छबी टाकून प्रचार करताना दिसत आहेत.तर जास्तीत जास्त मतदारांपर्यंत पोहचण्याचा प्रयत्न उमेदवार करत आहेत. मात्र झालेल्या राजकीय चिखलामुळे मतदारांमध्ये काही ठिकाणी नाराजीचा सूर देखील उमटत आहे.
