नवीन नियम कुणासाठी लागू ?
मुंबई : राज्य सरकारने विविध सरकारी कागदपत्रांमध्ये आईच्या नावाचा समावेश करण्याचा निर्णय घेतल्यानंतर आता सातबारा उताऱ्यावर ही अर्जदाराच्या नावानंतर त्याच्या आईचा नावाचा समावेश करण्याचा निर्णय भूमी अभिलेख विभागाने घेतला आहे. त्यामुळे 01 मे 2024 नंतर जन्मलेल्या व्यक्तीच्या नावे जमीन खरेदीनंतर सातबारा उताऱ्यावर अर्जदारासह आईच्या नावाचा समावेश होणार आहे. त्या संदर्भात संगणक प्रणालीत बदल करण्याची प्रक्रिया भूमी अभिलेख विभागामार्फत सुरू आहे. येणाऱ्या सहा महिन्यात त्याची अंमलबजावणी सुरू होणार आहे. महिला व बालकल्याण विभागाने आईच्या नावाचा समावेश करण्याचा निर्णय घेतला त्याच धर्तीवर भूमी अभिलेख विभागांनी ही सुविधा राबविण्याचा निर्णय घेतला आहे. याबाबत विभागातील ई फेरफार प्रकल्पाच्या संचालक सरिता नरके म्हणाल्या दिनांक 1 मे नंतर जन्माला आलेल्या व्यक्तीचे रेकॉर्ड तयार व्हायला काही कालावधी जातो. मात्र सध्या व्यक्तीच्या नावासोबत आईच्या नावाचा समावेश करण्यासाठी आईच्या नावाचा नवा रकाना तयार करण्यात येणार आहे. विवाहित स्त्रियांच्या बाबतीत सध्या अस्तित्वात असलेल्या पद्धतीनुसार त्यांच्या विवाह नंतरचे म्हणजेच तिचे नाव नंतर तिच्या पतीचे नाव आणि आडनाव अशा स्वरूपात नाव नोंदविण्याची प्रक्रिया सुरू ठेवण्यात येणार आहे.
