महापालिका निवडणुकांपूर्वीच नाशकात कॉग्रेसला मोठा धक्का
नाशिक: नाशकात विधानसभा निवडणुका संपल्यानंतर कॉग्रेस पक्षात गळती लागण्यास सुरवात झाली असून काही दिवसांपूर्वी कॉग्रेसचे निष्ठावंत नगरसेवक जॉय कांबळे यांनी कॉग्रेस पक्षाला राम-राम करत शिंदे गटाच्या शिवसेनेत प्रवेश केला. या प्रवेशाची चर्चा सुरू असतानाच पुन्हा एकदा नाशिक शहरात कॉग्रेस पक्षाला मोठा धक्का बसण्याची शक्यता असून कॉग्रेस पक्षाच्या जेष्ठ नेत्या व प्रवक्त्या डॉ हेमलता पाटील या कॉग्रेस पक्ष सोडण्याच्या तयारीत असून तसे संकेत देखील त्यांनी फेसबुकवर पोस्ट करून दिले आहेत. 2019 मध्ये झालेल्या विधानसभा निवडणुकीत काँग्रेस पक्षाच्या काही ज्येष्ठ नेत्यांनी उमेदवारीसाठी प्रयत्न केले आणि प्रत्यक्ष उमेदवारी मिळू लागली तेव्हा नकार दिला.पक्षाच्या अशा वाईट प्रसंगाच्या वेळी डॉक्टर हेमलता पाटील यांनी तत्कालीन भाजप आमदार देवयानी फरांदे यांच्या विरोधात कुठलीही तयारी नसताना निवडणूक लढवली आणि सुमारे 73 हजार मते मिळवली होती.
यंदा लोकसभा निवडणुकीतील निकाल पहाता काँग्रेस पक्षाला आणि डॉक्टर हेमलता पाटील यांना ही अनुकूल वातावरण होते. त्याचबरोबर काही महिन्यांपासून डॉ. हेमलता पाटील यांनी विधानसभा निवडणुकीची तयारी सुरू केली होती. त्या संदर्भात त्यांनी मतदारसंघ देखील पालथा घातला होता. त्यांनाच उमेदवारी मिळेल आणि आमदार देवयानी फरांदे यांना यंदा ही निवडणूक अवघड जाईल अशी चर्चाच राजकीय क्षेत्रात सुरू होती. मात्र ऐनवेळी कुठलीही पूर्व कल्पना न देता मध्य मतदारसंघ हा ठाकरे गटाच्या शिवसेनेला सोडण्यात आला त्यामुळे हेमलता पाटील या नाराज होत्या. यादरम्यान पक्षश्रेष्ठी मात्र अद्याप जागा वाटप झालंच नसल्याचे सांगत होते. तर दुसरीकडे मात्र ठाकरे गटाच्या उमेदवाराला मुंबईत बोलावत “एबी” फार्म देण्यात आला होता. त्यामुळे कॉग्रेस कार्यकर्ते कमालीचे नाराज झाले होते. त्यांनी कॉग्रेस पक्षाच्या कार्यालयाला कुलुप देखील ठोकले होते. कुणालाही विश्वासात न घेता परस्पर निर्णय घेतले जात असतील तर पक्षात राहून उपयोग काय अशी संतप्त भावना देखील हेमलता पाटील यांनी व्यक्त केली होती. पक्षाच्या अवघड परिस्थिती देखील पाटील या कायमच पक्षासोबत राहिल्या होत्या. मात्र त्यांच्या जाण्याने कॉग्रेस पक्षाला मोठा धक्का बसणार असून आता डॉ हेमलता पाटील नेमक्या कोणत्या पक्षात जाणार याबाबत उत्सुकता लागली असून भाजपा अथवा शिंदे गटाच्या शिवसेनेला त्या पसंती देण्याची शक्यता वर्तवली जात आहे.
