पोलीस प्रशासनाने घेतली गंभीर दखल,35 जणांवर दंगलीचा गुन्हा दाखल
नाशिक : सिडको परिसरातील सावतानगर भागात दुपारच्या सुमारास ठाकरे गटाची शिवसेना व भाजप कार्यकर्ते आमने-सामने आल्यामुळे मोठा राडा होऊन परिसरात तणाव निर्माण झाला होता. या झालेल्या राड्याची पोलीस प्रशासनाकडून गंभीर दखल घेण्यात आली असून 35 जणांवर दंगलीचा गुन्हा दाखल करण्यात आला आहे. याप्रकरणी अंबड पोलीस ठाण्यात प्रदीप प्रल्हाद चव्हाण यांनी दिलेल्या फिर्यादीनुसार चव्हाण व त्यांच्यासोबत असलेले मुकेश शहाणे हे कार्यकर्त्यांना विचारणा करत होते. यावेळी संशयित सुमित पगारे यांनी फोन करून संशयित सद्दाम शेख, मयुरेश बडगुजर, यांना बोलावून घेतले. त्यांच्यासोबत सुमारे 40 ते 50 जण वाहनांमधून घातक शस्त्रे लाठ्या काठ्या घेऊन आले. सद्दामने प्रदीपच्या डाव्या हाताच्या दंडावर शस्त्राने वार केला. त्यात त्याला दुखापत झाल्याचे फिर्यादीत म्हटले आहे. तसेच फिर्यादी सद्दाम बाबू शेख (रा.अमृतधाम) यांनी दिलेल्या फिर्यादीनुसार आम्ही महाविकास आघाडीच्या उमेदवाराच्या प्रचार करत असताना तेथे संशयित मुकेश शहाणे व त्यांच्या पाच साथीदारांकडून महाविकास आघाडीच्या कार्यकर्त्यांना शिवीगाळ करत होते. यावेळी शहाणे यांनी दमबाजी करत धारदार हत्याराने जोरदार प्रहार केल्याचे म्हटले आहे. याप्रकरणी पोलीस प्रशासनाकडून गंभीर दखल घेत बेकायदेशीरपणे जमा गोळा करून घातक शस्त्रांसह या जमावत प्रवेश करत दंगल घडून सार्वजनिक शांतता भंग केल्याप्रकरणी अंबड पोलीस ठाण्यात संशयित मयुरेश बडगुजर माजी नगरसेवक मुकेश शहाणे सद्दाम शेख यांच्यासह सुमारे 35 जणांविरुद्ध गुन्हा दाखल करण्यात आला आहे. यामध्ये संशयीतांपैकी सद्दाम शेख, बाळा निकम, या दोघांना अटक करण्यात आली आहे तसेच काही संशयितांना चौकशीसाठी ताब्यात घेण्यात आले आहे. काही फरार संशयितांचा पोलिसांकडून शोध घेतला जात आहे.
