विधानसभा निवडणुकीपूर्वीच आरोप-प्रत्यारोप
नाशिक : विधानसभा निवडणुका घोषित होण्यापूर्वीच नाशिक शहरातील राजकारणात फटाके फुटण्यास सुरवात झाली असून ठाकरे गटाचे जिल्हाप्रमुख सुधाकर बडगुजर आणि भाजपाचे माजी नगरसेवक मुकेश शहाणे यांच्यात आरोप-प्रत्यारोप सुरू झाल्याने राजकीय वातावरण तापण्यास सुरवात झाली आहे. काही दिवसांपूर्वी सिडकोत झालेल्या गोळीबारात ठाकरे गटाच्या शिवसेनेचे जिल्हाप्रमुख सुधाकर बडगुजर यांचा मुलगा दीपक बडगुजर यांचे नाव आल्यानंतर राजकिय क्षेत्रात खळबळ उडाली अडतानाच आज पुन्हा नाशिक येथील सिडको परिसरातील भाजपाचे माजी नगरसेवक मुकेश शहाणे यांना जीवे मारण्याची धमकी मिळाल्याचे समोर आले आहे. शहाणे यांना बुधवारी मध्यरात्रीच्या सुमारास एका व्यक्तीने फोन करून जीवे मारण्याची धमकी दिली मुख्य म्हणजे शिवसेना जिल्हाप्रमुख सुधाकर बडगुजर यांच्या सांगण्यावरून जीवे मारण्याची धमकी दिल्याचा आरोप भाजपा नगरसेवक मुकेश शहाणे यांनी केला आहे. या सर्व घटनेनंतर मुकेश शहाणे यांनी अंबड पोलीस ठाण्यामध्ये वरिष्ठ पोलीस निरीक्षक पवार यांची भेट घेऊन या घटनेतील व्यक्तींवर कारवाई करण्याची मागणी केली.यावेळी सिडको परिसरातील भाजपा पदाधिकारी उपस्थित होते. धमकीबाबत अंबड पोलीस ठाण्यात अदखलपात्र गुन्हा दाखल झाल्याचे समजते.
त्यांच्या पायाखालची वाळू सरकली -सुधाकर बडगुजर मुकेश शहाणेंचे आरोप म्हणजे चोराच्या उलट्या बोंबा आहेत. महिला आघाडीने आंदोलन केलं होतं. आंदोलन केले त्याची ही प्रतिक्रिया आहे. आंदोलनामुळे त्यांच्या पायाखालची वाळू सरकली आहे. आज काहीतरी करायचे म्हणून आरोप केले आहेत. धमकी देणारा तो व्यक्तीच सांगेल की कोणी सांगितले. कोणी धमकी द्यायला सांगितले, याचा पोलीस तपास करतील.
