दहशतवाद्यांची घरे उध्वस्त
वृत्तसंस्था : पहलगाम येथे दहशतवाद्यांनी भ्याड हल्ला करून सुमारे २६ पर्यटकांची हत्या केली होती.काश्मीरमधील पहलगाम येथे देशाच्या विविध राज्‍यांमधून पर्यटनासाठी नागरिक आले होते. या घटनेमुळे देशभरात संतापाचं वातावरण निर्माण झालेलं आहे. पहलगाममध्ये हल्ला करणाऱ्यांमध्ये पाकिस्तानी दहशतवाद्यांसोबत दोन स्थानिक दहशतवाद्यांचाही समावेश असल्याचं समोर आलं होतं. दरम्यान, या हल्ल्यात सहभाग असलेल्या आसिफ शेख आणि आदिल या दोन स्थानिक दहशतवाद्यांची घरं सुरक्षा दलांनी आज उद्ध्वस्त केली. लष्कराने जम्मू काश्मीरमधील दक्षिण काश्मीर भागात असलेल्या अनंतनाग आणि पुलवामा भागात ही कारवाई केली आहे.आदिल शेख हा दहशतवादी २०१८ मध्ये पाकिस्तानमध्ये गेला होता. तिथे त्याने दहशतवादाचं प्रशिक्षण घेतलं होतं. प्रशिक्षण पूर्ण झाल्यावर तो पुन्हा काश्मीरमध्ये परत आला होता. पहलगामध्ये हल्ला घडवून आणण्यासाठी त्याने पाकिस्तानी दहशतवाद्यांना मदत केल्याचा आरोप आहे. त्यानेच इतर पाकिस्तानी दहशतवाद्यांना बेसरन खोऱ्यापर्यंत पोहोचवल्याचे सांगितले जात आहेत. पहलगाममधील बेसरन खोऱ्यात हल्ला केल्यानंतर आसिफ शेख आणि आदिल हे दोघेही फरार आहेत. त्यांना पकडण्यासाठी लष्कराकडून जोरदार शोधमोहीम हाती घेण्यात आली आहे.
