डंपर ज्या ठिकाणी उभा होता तिथला रस्ता थेट 10 ते 12 फुट खोल खाली खचला.
नाशिक : शहरात पुढच्यावर्षी सिंहस्थ कुंभमेळ्याचे आयोजन होणार आहे. या कुंभमेळ्याच्या पार्श्वभूमीवर नाशिकमध्ये प्रचंड मोठ्या प्रमाणात कामे सुरु आहेत. या विकासकामांसाठी कोट्यवधी रुपयांचा निधी मंजूर झाला आहे. रस्ते, पाणी पुरवठा, मलनिस्सारण, वीज तसेच पायाभूत सुविधांचे काम एकाचवेळी सुरु आहे. यादरम्यान नाशिकमधील रस्त्यांंवरील खड्ड्यांचा प्रश्न राज्यभर अगोदरच चर्चेत आहे. या खड्ड्यांमुळे नाशिक शहरातील पाच नागरिकांचे बळी गेल्याने नाशिककरांमध्ये संतापाचे वातावरण असतानाच त्यात भर घालणारी घटना समोर आली आहे. गंगापूर रोडवर नवश्या गणपती परिसरात हा प्रकार घडला आहे. मिळालेल्या माहितीनुसार एक खडीने भरलेला डंपर खडी उतरवत असताना धक्कादायक प्रकार घडला. डंपर ज्या ठिकाणी उभा होता तिथला रस्ता थेट 10 ते 12 फुट खोल खाली खचला. यामुळे हा डंपर या दहा ते बारा फुटांच्या खड्ड्यात अडकला. आजच्या या घटनेनं रस्त्याच्या कामाच्या दर्जावर आणि सुरक्षिततेवर प्रश्नचिन्ह निर्माण झाले आहे. तसेच या घटनेत सुदैवाने मोठी जीवितहानी टळली आहे. मात्र या घटनेमुळे शहरातील रस्त्यांचे कामे आणि खड्डे यांचा प्रश्न पुन्हा ऐरणीवर आला आहे. नाशिकचे पालकमंत्री गिरीश महाजन यांच्याकडून 80 टक्के खड्डे बुजवल्याचा आणि कामाची गुणवत्ता चांगला असल्याचा दावा केला जात आहे. यामध्ये ही घटना घडल्याने रस्त्याच्या कामाचा दर्जा काय आहे? असा प्रश्न उपस्थित होतोय. सुदैवाने कोणतीही दुर्घटना घडली नाही. या घटनेत कुणाचा जीव गेला असता तर त्याला जबाबदार कोण असतं? असा प्रश्न या निमित्ताने नागरिक उपस्थित करत आहेत.
