महायुती होण्याची शक्यता शिंदे गटाला 32 जागा तर राष्ट्रवादीला देखील क्षमतेनुसार जागा सोडण्याची भाजपची तयारी- सूत्र
नाशिक : सुरवातीच्या काळात महापालिका निवडणुकीसाठी राज्याचे जलसंपदा मंत्री गिरीश महाजन यांनी 100 प्लसचा नारा दिला होता. त्यानंतर या घोषणेने नाराज झालेल्या शिंदे गटाच्या शिवसेनेनेदेखील स्वबळाची भाषा सुरू केली होती तर अजित पवार गटाच्या राष्ट्रवादीने या सर्वांपासून लांब रहाणे पसंत केले होते. मात्र ठाकरेंच्या होणाऱ्या युतीमुळे बहुदा भाजप पुन्हा जमिनीवर आल्याचे चित्र आहे. याचे उदाहरण म्हणजे भाजपच्या निवडणूक प्रमुख आमदार देवयानी फरांदे यांनी देखील स्वबळाचे संकेत दिले मात्र याला खोडून काढत मंत्री गिरीश महाजन यांनी महायुतीवर भर दिला. याला कारण म्हणजे मुख्यमंत्री देवेंद्र फडणवीस यांनी शिवसेनेला सोबत घेण्याच्या सूचना केल्या तर उपमुख्यमंत्री एकनाथ शिंदे यांनीदेखील भाजप सोबतच निवडणूक लढविण्याच्या सूचना केल्यानंतर मंत्री,पदाधिकारी, कामाला लागले. त्यानंतर भाजपचे मंत्री गिरीश महाजन, शिंदे गटाचे मंत्री दादा भुसे, राष्ट्रवादी अजित पवार गटाचे माजी खा. समीर भुजबळ यांच्यात बैठक झाल्याची माहिती समोर येत असून ही बैठक एका मोठ्या हॉटेलमध्ये झाल्याची माहिती मिळत आहे. यादरम्यान शिंदे गटाच्या शिवसेनेने 45 जागा मागितल्या असून सूत्रांच्या माहितीनुसार भाजपने 32 जागा सोडण्याची तयारी दर्शवली आहे तर राष्ट्रवादी अजित पवार गटाने देखील 30 जागांवर दावा सांगितलला आहे. मात्र पक्षाच्या क्षमतेनुसार जागा सोडणार असल्याचे समजते. त्यानंतर स्थानिक पातळीवर कोअर कमिटीच्या बैठका घेऊन चर्चा करण्यास मंत्री गिरीश महाजन यांनी सांगितल्याचे समजते. सोमवारी बऱ्यापैकी जागावाटपाचे चित्र स्पष्ट होणार असल्याचे समजते. या झालेल्या चर्चेत आमदार सुहास कांदे माजी खासदार हेमंत गोडसे अजय बोरस्ते विजय करंजकर शहराध्यक्ष प्रवीण तिदमे उपस्थिती असल्याची माहिती मिळत असून राष्ट्रवादी अजित पवार गटाकडून शहराध्यक्ष रंजन ठाकरे हे उपस्थित असल्याचे समजते.मंत्री गिरीश महाजन यांच्यासोबत राष्ट्रवादी अजित पवार गट व शिंदे गटाच्या शिवसेनेच्या वेगवेगळ्या बैठका झाल्याची माहिती मिळत आहे.
