जाधव यांची पक्षातून हकालपट्टी करा भाजप आमदार सीमा हिरे यांची मागणी
नाशिक : विधानसभा निवडणुका संपल्या आणि महायुतीने जबरदस्त यश मिळविले यामध्ये नाशिकच्या तीनही मतदारसंघात भाजपचे विद्यमान आमदार निवडुन आले. आता या आमदारांची तिरकी नजर बंडखोरांवर वळाली असून निवडणुकीत त्रास देणाऱ्या बंडखोरांना पक्षात घेऊ नका त्याचबरोबर ज्या बंडखोरांची अजूनही पक्षातून हकालपट्टी झालेली नाही. त्यांची पक्षातून हकालपट्टी करण्याची मागणी भाजप आमदारांनी केली आहे .नाशिक पश्चिम विधानसभा मतदारसंघात भाजपच्या आमदार सीमा हिरे यांच्या विरोधात अनेकांनी बंडखोरी करत पक्ष विरोधी काम केल्याचे समोर आले होते.यामध्ये मा. नगरसेवक दिनकर पाटील यांनी भाजपला रामराम करत मनसेत प्रवेश करत मनसेकडून उमेदवारी मिळवत आमदार सीमा हिरे यांच्या विरोधात मतदारसंघात आव्हान उभे केले होते. त्याचबरोबर मा. नगरसेविका इंदूबाई नागरे, रवींद्र धिवरे,पल्लवी पाटील, विक्रम नागरे, अमोल पाटील, सार्थक नागरे,स्वप्नील पाटील, निलेश भांदुरे यांची भाजपने पक्षातून निवडणूक काळातच हकालपट्टी केली होती .यामध्ये माजी नगरसेवक शशिकांत जाधव हे ठाकरे गटाच्या शिवसेनेत प्रवेश करणार होते. अशी चर्चा होती मात्र काही कारणावरून हा प्रवेश होऊ शकला नाही. मात्र शशिकांत जाधव यांनी भाजपमध्ये राहत भाजप उमेदवार सीमा हिरे यांच्या विरोधात प्रचार करत ठाकरे गटाचे उमेदवार सुधाकर बडगुजर यांचा प्रचार केल्याचा आरोप त्यांच्यावर करण्यात आला. म्हणून पक्ष विरोधी काम करणाऱ्या शशिकांत जाधव यांच्यासह पदाधिकाऱ्यांची पक्षातून हकालपट्टी करण्याची मागणी आमदार सीमा हिरे यांनी भाजप शहराध्यक्ष प्रशांत जाधव यांच्याकडे पत्राद्वारे केली आहे.
