नाराज असलेले विजय करंजकर बंडखोरीच्या तयारीत
नाशिक: लोकसभेत महायुतीचा तिढा अजूनही संपलेला नसताना स्वामी शांतिगिरी महाराज यांनी शिवसेनेच्या नावाने उमेदवारी अर्ज भरला यामुळे गोंधळात अजून भर पडली. तर दुसरीकडे महाआघाडीच्या ठाकरे गटाकडून नाशिक लोकसभेसाठी राजाभाऊ वाजे यांची उमेदवारी घोषित करण्यात आली मात्र आघाडीत सर्वच काही अलबेल नसल्याचे चित्र उभे टाकले आहे. नासिक लोकसभा मतदार संघातील ठाकरे गटाचे शिलेदार व सध्या नाराज असलेले विजय करंजकर यांनी उमेदवारी अर्ज नेल्याने ठाकरे ठाकरे गटाची नाशिक लोकसभा मतदारसंघात डोकेदुखी वाढण्याची दाट शक्यता आहे. राज्यपाल नियुक्त विधान परिषद सदस्यासाठी विजय करंजकर यांना संधी देण्यात आली होती. मात्र तत्कालीन राज्यपालांनी नियुक्तीच केली नसल्याने त्यांची ही संधी हुकली त्यामुळे त्यांच्याविषयी पक्षात आणि नागरिकांमध्ये सहानुभूती निर्माण झाली. या सहानभूतीचा फायदा घेण्यासाठी ठाकरे गटाच्या वतीने विजय करंजकर यांना नासिक लोकसभा मतदारसंघातून उमेदवारी देण्याची तयारी झाली होती. त्याचबरोबर विजय करंजकर यांना वरिष्ठ पातळीवरून तयारीला लागण्याच्या सूचना देखील देण्यात आल्या होत्या त्यानुसार विजय करंजकर यांनी मतदारसंघ पिंजून काढण्यास सुरुवात केली होती. नासिक मधील ठाकरे गटाच्या शिवसैनिकांना देखील विजय करंजकर यांची उमेदवारी फायनल वाटल्याने त्यांनी देखील प्रचाराला सुरुवात केली होती. मात्र अचानक पणे विजय करंजकर यांचा पत्ता कट करत सिन्नर चे माजी आमदार राजाभाऊ वाजे यांना ठाकरे गटाकडून उमेदवारी देण्यात आली. त्यामुळे नाराज असलेल्या विजय करंजकर यांचा संताप अनावर झाला. व त्यांनी बंडखोरीची तयारी केली होती. पक्षप्रमुख उद्धव ठाकरे यांच्याशी चर्चा करून निर्णय घेऊ असे त्यांनी सांगितले देखील होते. विशेष म्हणजे उद्धव ठाकरे यांनी तीन वेळेस विजय करंजकर यांना भेटण्यासाठी बोलावले होते मात्र करंजकर हे गेले नाहीत. त्याऐवजी ते महायुतीच्या संपर्कात आले. यादरम्यान त्यांनी शिर्डी विमानतळावर मुख्यमंत्री एकनाथ शिंदे यांची भेट देखील घेतल्याची चर्चा होती. त्याचबरोबर करंजकर यांनी उपमुख्यमंत्री देवेंद्र फडणवीस यांची देखील भेट घेतली होती. मात्र महायुतीतच अजून उमेदवार ठरत नसल्याने अखेर काल त्यांनी उमेदवारी अर्ज नेला असून तो भरण्याची शक्यता आहे. यामुळे बंडखोरी झाल्यास याचा त्रास महाआघाडीतील ठाकरे गटाला होण्याची शक्यता निर्माण आहे. मात्र विजय करंजकर हे पक्षाबरोबर एकनिष्ठ राहतात अथवा बंडखोरी करतात अथवा ठाकरे गट बंडखोरी थांबविण्यात यशस्वी होतील .याकडे पक्षाचे आणि नाशिककरांचे लक्ष लागून आहे.
