मनसेला मोठा धक्का
नाशिक : महानगरपालिका निवडणुकांचा बिगुल वाजल्यानंतर नाशिक शहरात राजकीय हालचालींना मोठा वेग आला असतानाच मनसेला मोठा धक्का बसला आहे.नाशिकमध्ये भाजपमध्येही उमेदवारीवरून प्रचंड आक्रोश पाहायला मिळाला होता. अनेक निष्ठावंत कार्यकर्त्यांना उमेदवारी नाकारण्यात आल्याने संतप्त कार्यकर्त्यांनी भाजप शहराध्यक्ष सुनील केदार यांना घेराव घालत निषेध नोंदवला होता. काही कार्यकर्त्यांनी प्रतीकात्मक स्वरूपात त्यांना गाजर देत नाराजी व्यक्त केली होती. त्यामुळे भाजपच्या निष्ठावंतांमध्ये असंतोष उफाळून आला असल्याचे चित्र दिसून आले. असतानाच उमेदवारी अर्ज माघारी घेण्यावरून जवळपास सर्वच पक्षांमध्ये अंतर्गत नाराजी समोर आली आहे. यामध्ये मनसेचा देखील समावेश असून मनसेचा महिला चेहरा म्हणून प्रसिद्ध असलेल्या मनसेच्या माजी नगरसेविका सुजाता डेरे यांनी भारतीय जनता पक्षात प्रवेश केला. भाजपचे महाराष्ट्र प्रदेशाध्यक्ष रवींद्र चव्हाण आणि मंत्री गिरीश महाजन यांच्या उपस्थितीत हा पक्ष प्रवेश पार पडला. सुजाता डेरे यांनी नाशिकमधून महापालिका निवडणुकीसाठी उमेदवारी अर्ज भरला होता. मनसे पक्षाकडून त्यांना एबी फॉर्म देण्यात आला असतानाही त्यांनी अचानक आपली अधिकृत उमेदवारी मागे घेतली होती. त्यांच्या या अनपेक्षित माघारीमुळे राजकीय वर्तुळात मोठा संभ्रम निर्माण झाला असताना महापालिकेसाठी प्रभाग क्रमांक १२ क मधून मनसेकडून उमेदवारी जाहीर झाली होती. परंतु, त्यांना शिवसेना (उबाठा) च्या उमेदवारासाठी माघार घ्यावी लागली. त्यामुळे त्या नाराज झाल्याचे बोलले जात होते. यानंतर त्यांनी आपल्या समर्थकांसह भाजपमध्ये प्रवेश केला यामुळे मनसेला मोठा राजकीय धक्का मानला जात आहे.
