नाशकात भाजपमध्ये अजून काही धक्कादायक निर्णय

आमदार फरांदे यांचे स्वबळाचे संकेत तर महाजनांचा महायुतीवर भर

नाशिक : महानगरपालिका निवडणूक प्रमुखपदी निवडीनंतर आमदार देवयानी फरांदे लगेच कार्यरत झाल्या असून शुक्रवारी भाजपच्या वसंतस्मृती कार्यालयात फरांदे यांचा सत्कार करण्यात आला. यावेळी आ सीमा हिरे, शहराध्यक्ष सुनील केदार, लक्ष्मण सावजी बाळासाहेब सानप विजय साने सुधाकर बडगुजर आधी उपस्थित होते यादरम्यान बोलताना आमदार फरांदे म्हणाल्या पक्षाने माझ्यावर जबाबदारी वाढवली असून येत्या महापालिका निवडणुकीत 122 जागांवर फक्त कमळ फुलविण्याचा निर्धार व्यक्त करताना आमदार फरांदे यांनी एकप्रकारे स्वबळाचेच संकेत दिलेत. तर दुसरीकडे महायुती म्हणून निवडणूक लढवण्याची इच्छा असल्याची माहिती कुंभमेळा मंत्री गिरीश महाजन यांनी दिली त्यामुळे भाजप कार्यकर्ते संभ्रमात असून युती होणार की पक्ष स्वबळावर लढणार याचीच चर्चा सुरू आहे. त्याचबरोबर येत्या काही दिवसात भाजपमध्ये आणखी काही धक्कादायक निर्णय घेतले जाण्याची शक्यताही काही पदाधिकाऱ्यांनी व्यक्त केली. त्याचबरोबर फरांदे यांच्या जेष्ठतेचा विचार करून ही जबाबदारी त्यांना देण्यात आली असेल त्यांची निवड झाली असली तरी उमेदवार देताना किंवा कोणताही निर्णय घेताना तिन्ही आमदारांना सारखेच स्थान असेल असेही महाजन म्हणाले.