चिथावणीखोर रिल्स बनवणाऱ्या 19 युजर्सवर पोलिसांनी केले गुन्हे दाखल
नाशिक :सोशल मीडियाचा गैरवापर करत कायदा सुव्यवस्था व सामाजिक शांततेला बांधा निर्माण होईल अशा प्रकारच्या मजकुरासह एका विशिष्ट युवकाचे छायाचित्र वापरून रिल्स बनविणाऱ्या इंस्टाग्रामवरील 19 समाजकंटक युजर्स वर पोलिसांनी गुन्हे दाखल केले आहेत. या प्रकरणी पोलिसांनी तपासाला मोठ्या प्रमाणात वेग दिला आहे. काही दिवसांपूर्वी सोशल मीडियावर धार्मिक भावना दुखावणारी आक्षेपार्ह पोस्ट टाकण्यात आली होती. यामुळे द्वारका ते उपनगर दरम्यान पुणे महामार्गावर एक मोठा जमाव जमला होता यावेळी या भागात मध्यरात्री जमावाने रास्ता रोको आंदोलन करत आक्षेपार्ह पोस्ट टाकणाऱ्या युवकाला अटक करण्याची मागणी केली होती. उपनगर पोलिसांनी त्या युवकाला ताब्यात घेत गुन्हा दाखल करून अटक केल्यानंतर जमावाने आंदोलन मागे घेतले होते. यावेळी एका सिटीलिंगच्या बसवर दगडफेक करण्यात आली होती. यामुळे परिसरात तणावाचे वातावरण निर्माण झाले होते.अज्ञात जमावाविरुद्ध भद्रकाली, उपनगर या दोन्ही पोलिस ठाण्यात घटनेच्या दिवशी गुन्हे दाखल करण्यात आले होते. गुन्ह्यांचा तपास पोलिसांकडून केला जात आहे. दरम्यान या घटनेनंतर सोशल मीडियावरील आक्षेपार्ह पोस्टवर पोलिसांची करडी नजर आहे. व्हाट्सअप स्टेटस, फेसबुक रिल्स इंस्टा रिल्स, याची वारंवार पडताळणी केली जात आहे. यामध्ये कायद्याला आव्हान देणं,आक्षेपार्ह पोस्ट टाकणे याबद्दल उपनगर पोलिसात गुन्हे दाखल करण्यात आले आहे.
