दोन गट भिडले प्रकरण शिवीगाळ,कॉलर धरण्यापर्यंत
नाशिक : महानगरपालिका निवडणुका डोळ्यासमोर ठेवत सर्वच राजकीय पक्ष तयारीला लागले असताना काही पक्षांमधील गटबाजी बाहेर येऊ लागली असून याचे रूपांतर राड्यात होऊ लागले आहे. काही दिवसांपूर्वी मनसे-ठाकरे गटाच्या शिवसेना बैठकीमध्ये ठाकरे गटाच्या शिवसेनेतील दोन नेत्यांमध्ये बाचाबाची झाल्याचे समोर आले होते. तर आज नाशिकमध्ये शिंदे गटाच्या शिवसेना पक्षाची उत्तर महाराष्ट्रातील पदाधिकाऱ्यांची बैठक पार पडली. या बैठकीत अहिल्यानगर जिल्ह्याचा आढावा घेणारी बैठक झाल्यानंतर मोठा राडा झाल्याचे बघायला मिळाला. या ठिकाणी दोन गट आमने-सामने आल्यानंतर बाचाबाची, शिवीगाळ करण्यात आली. तर हे प्रकरण थेट कॉलर पकडेपर्यंत गेल्याने परिस्थिती तणावपूर्ण झाली होती.शिवसेना शिंदे गटाच्या उत्तर महाराष्ट्रातील पदाधिकाऱ्यांच्या बैठकीचे आयोजन नाशिकमध्ये करण्यात आले होते. या बैठकीसाठी मंत्री उदय सामंत, दादा भुसे आणि खासदार राहुल शेवाळे हॉटेलमध्ये उपस्थित होते. या बैठकीदरम्यानच दोन गटात जोरदार राडा झाला. अहिल्यानगरचे शहरप्रमुख सचिन जाधव आणि बाबू शेठ यांच्यात राडा झाला असून शरद पवारांच्या राष्ट्रवादीचा पदाधिकारी बैठकीत शिरल्याचा आरोप करत दोन गट आपापसात भिडले. मुख्य म्हणजे महानगरपालिका आणि जिल्हा परिषद निवडणुकीच्या पूर्वतयारीसाठी शिंदे गटाच्या शिवसेनेने अहिल्यानगर, नंदुरबार, धुळे, जळगाव आणि नाशिक जिल्ह्यातील पदाधिकाऱ्यांच्या जिल्हानिहाय बैठकीचे आयोजन नाशिक येथील हॉटेल एक्स्प्रेस इन येथील सभागृहात केले होते. बैठकीस नेते, उपनेते, पालकमंत्री, आजी-माजी मंत्री, खासदार, आमदार, संपर्कप्रमुख, सहसंपर्कप्रमुख, जिल्हाप्रमुख, महानगरप्रमुख, तालुकाप्रमुख, शहरप्रमुख आणि पक्ष प्रवेश झालेल्या प्रमुख पदाधिकाऱ्यांना निमंत्रित करण्यात आले होते. मात्र कार्यकर्ते एकमेकांवर चालून गेले. त्यामुळे तणावाची परिस्थिती निर्माण झाली. पोलिसांसह सुरक्षा रक्षकांनी मध्यस्थी केली. या राड्याची चर्चा आज दिवसभर शहरात सुरू होती.
