अमेरिका, कॅनडासह अनेक देशांतील नागरिकांची आर्थिक फसवणूक
नाशिक : आज सीबीआयने नाशिक जिल्ह्यातील इगतपुरी येथील बेकायदेशीर कॉल सेंटरचा पर्दाफाश केला आहे. ॲमेझॉन सहायता सेवेचे कॉल सेंटर असल्याचे भासवत संशयितांनी येथून परदेशात फसवे फोन केले. अमेरिका, कॅनडासह अनेक देशांतील नागरिकांची आर्थिक फसवणूक केल्याचे उघड झाले आहे.इगतपुरी परिसरातील आलिशान असलेल्या”रेन फॉरेस्ट रिसॉर्ट” येथे भाडेतत्वावरील जागेत संशयितांकडून बेकायदेशीर कॉल सेटर चालविण्यात येत होते.आरोपी मोठ्या नफ्याचे आमिष दाखवून लोकांच्या बँक खात्यांमधून पैसे उकळत असल्याची माहिती समोर आली आहे. या प्रकरणी मुंबईतील सहा जणांसह बँक अधिकाऱ्यांविरुद्ध सायबर फसवणुकीचा गुन्हा दाखल करण्यात आला आहे.सीबीआयने दाखल केलेल्या प्रथम माहिती अहवालमध्ये नमूद केल्यानुसार, आरोपींनी परस्परांच्या सोबतीने, तसेच इतर काही अज्ञात व्यक्तींसोबत गुन्हेगारी कट रचून, बेकायदेशीर कॉल सेंटरच्या माध्यमातून स्वतःला अमेझॉन सपोर्ट सर्व्हिसेस कॉल सेंटरचे प्रतिनिधी असल्याचे भासवले, आणि त्यांनी फसव्या कॉल्सच्या माध्यमातून आर्थिक फसवणूक केली.गुन्ह्यातील आरोपी अमेरिका, कॅनडा आणि इतर देशांतील नागरिकांची फसवणूक करून, त्यांच्याकडून गिफ्ट कार्ड्स किंवा क्रिप्टो करन्सीच्या माध्यमातून बेकायदेशीर कमाई करत होते. हे कॉल सेंटर नाशिकमधील इगतपुरी इथून चालवले जात होते. आरोपींनी हे बेकायदेशीर कॉल सेंटर चालवण्यासाठी डायलर्स, व्हेरिफायर्स आणि क्लोजर्स अशा पदांअंतर्गत सुमारे 60 कर्मचाऱ्यांची नेमणूक केली होती. सीबीआयने केलेल्या तपास आणि कारवाई अंतर्गत 44 लॅपटॉप, 71 मोबाईल फोन आणि इतर महत्त्वाच्या डिजिटल पुराव्यासंह, 1.20 कोटी रुपयांची बेहिशेबी रोकड, 500 ग्रॅम सोने आणि 1 कोटी रुपये किमतीच्या 7 आलिशान गाड्या जप्त करण्यात आल्या आहेत.
या कॉलसेंटरच्या माध्यमातून अंदाजे 5000 USDT क्रिप्टोकरन्सी (5 लाख रुपये) मूल्याचे, तसेच 2000 कॅनेडियन डॉलरचे गिफ्ट व्हाउचरचे (1.26 लाख रुपये) व्यवहार आढळून आले. यासोबतच संबंधित कॉलसेंटरच्या ठिकाणी सीबीआयने छापा मारल्यानंतर तिथे कॉल सेंटरमध्ये कार्यरत असलेले 62 कर्मचारी परदेशी नागरिकांना फसवण्याचे काम करत असल्याचे आढळून आले. या प्रकरणात सीबीआयने आतापर्यंत 5 आरोपींना अटक केली यामध्ये आरोपींची ओळख पटली असून त्यांची नावे विशाल यादव, शेहबाज, दुर्गेश, अभय राज आणि समीर उर्फ कालिया उर्फ सोहेल अशी आहेत, असे अधिकाऱ्याने सांगितले.असून पुढचा तपास सुरू आहे.
