शिंदे गटाच्या शिवसेनेची बैठक, उत्तर महाराष्ट्रातून येणार पदाधिकारी
नाशिक : एकीकडे महाराष्ट्रात महाराष्ट्र नवनिर्माण सेना आणि ठाकरे गटाची शिवसेना एकत्र येऊन आगामी महापालिका, जिल्हा परिषद आणि नगरपालिकांच्या निवडणुका लढण्याच्या तयारीत असताना आगामी बदलणारे राजकीय समीकरण बघता महायुती मधील सर्वच पक्ष जोरदार तयारीला लागले आहेत. यामध्ये भाजपने काही दिवसांपूर्वी मुंबईत राज्यातील सर्व जिल्हाध्यक्ष व शहराध्यक्ष यांना बोलावत आढावा घेतली होती. याचं धर्तीवर शिंदे गटाच्या शिवसेनेने निवडणुकांसाठी कंबर कसली असून सोमवारी (दि 11) उत्तर महाराष्ट्रातील पदाधिकाऱ्यांची महत्वाची बैठक नाशिकमध्ये होणार आहे. या बैठकीला पक्षनेते, उपनेते, पालकमंत्री, संपर्कमंत्री, प्रवक्ते, आजी-माजी खासदार, मंत्री, जिल्हाप्रमुख,पक्षात नव्याने आलेले पदाधिकारी, यांना निमंत्रित करण्यात आले आहेत. या बैठकीला उद्योगमंत्री उदय सामंत, खा. राहुल शेवाळे, पक्ष सचिव संजय मोरे मार्गदर्शन करणार आहेत. यादरम्यान पक्षाने स्वबळावर लढावे की एकला चलो रे.. ची भूमिका घ्यावी यावर चर्चा होण्याची शक्यता असून स्वबळावर लढल्यास व एकटे लढल्यास काय परिणाम होऊ शकतात यांसारखे विषय देखील चर्चेत येण्याची शक्यता आहे. त्याचबरोबर भाजपने आधीच 100 प्लस चा नारा देऊन स्वबळावर महापालिका लढण्याचे संकेत दिले आहेत.
