गुजरातमधून नाशिकला येत करायचे सोनसाखळी चोरी
नाशिक : पादचारी महिलांवर लक्ष ठेऊन गळ्यातील सोन्याची पोत बळजबरीने हिसकावून पळ काढणाऱ्या दोघांच्या मुसक्या आवळण्यात इंदिरानगर पोलिसांना यश आले असून मुख्य म्हणजे अट्टल सोनसाखळी चोरांसह ते आंतरराज्यीय गुन्हेगार असल्याचे उघड झाले आहे. या दोघा अट्टल चोरांना इंदिरानगर पोलिसांच्या गुन्हे शोध पथकाने अगदी सिनेस्टाईल पाठलाग करत गजाआड केले.मिळालेल्या माहितीनुसार पोलीस आयुक्त संदीप कर्णिक यांच्या आदेशानुसार सोनसाखळी चोरीच्या घटनांना आळा घालण्यासाठी दिवस-रात्र गस्ती घालण्याचे आदेश देण्यात आले होते. त्यानुसार इंदिरानगर पोलीस ठाण्याच्या वरिष्ठ पोलीस निरीक्षक तृप्ती सोनवणे यांच्या मार्गदर्शनाखाली हद्दीत गस्त सुरू असताना वडाळागावाकडून रविशंकर मार्गाजवळ एक काळ्या रंगाची नंबर प्लेट नसलेली दुचाकीवरून दोघे संशयित डिजीपीनगरच्या दिशेने जात होते. दुचाकीस्वाराने हेल्मेट तर मागे बसलेल्या व्यक्तीने टोपी व मास्क घातलेले होते. यादरम्यान पोलिसांना संशय आल्याने त्यांनी त्या व्यक्तींना थांबण्याचा इशारा केला मात्र संशयितांनी दुचाकीचा वेग अजून वाढवला अखेर पोलिसांनी त्यांचा पाठलाग सुरू केला असता इंदिरानगर सिग्नल जवळ गतिरोधक आल्याने दुचाकीचा वेग कमी झाला. या दरम्यान दुचाकी सोडून संशयित गोविंदनगरच्या दिशेने पळून जाऊ लागले पोलिसांनी त्यांचा पाठलाग सुरू ठेवत अखेर त्यांच्या मुसक्या आवळण्यात यश मिळविले. पोलिसांनी आपला खाक्या दाखवताच हे अट्टल गुन्हेगार पोपटासारखे बोलू लागले मयूर दिनेश बजरंगे (40) व जिग्नेश ऊर्फ जुगणु दिनेश घासी (42) दोघेही राहणार (छारानगर, कुबेरनगर, सरदारग्राम, अहमदाबाद गुजरात) यांनी अनेक गुन्ह्याची कबुली दिली असून महिलांची सोनसाखळी ओढण्यासाठी ते थेट गुजरातमधून नाशिकला यायचे शहरात आल्यावर दिवसभरात दोन ते तीन सोनसाखळी खेचून ते पुन्हा दिंडोरीरोडने डांग, सापुतारा, किंवा पेठमार्गे धर्मपुर या मार्गाने पळून जात या दोघांवर गांधीधाम, अंकलेश्वर जीआयडीसी, गोदरा डाऊन पोस्ट फतेहगंज बडोदा नवरंगपुरा अहमदाबाद बारडोली सुरत राजकोट ए डिव्हिजन या पोलीस ठाण्यात सात तर कोतवाली अहिल्यानगर शहादा नंदुरबार गडक टाउन हुबळी या पोलीस ठाण्यात प्रत्येकी दोन गुन्हे दाखल आहेत. त्याचबरोबर यांच्याविरोधात चोरी, जबरी चोरीचे 18 गुन्हे दाखल आहेत. 5 ऑगस्ट रोजी उपनगर हद्दीत पादचारी महिलेची सोनसाखळी बळजबरीने खेचून नेल्याची कबुली त्यांनी पोलिसांना दिली.ही कामगिरी गुन्हे शोध पथकाचे उपनिरीक्षक संतोष फुंदे, अंमलदार सागर परदेशी, योगेश जाधव, सागर कोळी, अमोल कोथमिरे, जयलाल राठोड, प्रमोद कासुदे यांनी केली.
