पिस्तुल वादावर अखेर पडदा, शिक्षकाने तक्रार घेतली मागे
इंदिरानगर : परिसरातील श्रद्धा विहार कॉलनीतुन वडाळा पाथर्डी रस्त्यावरून माजी नगरसेवक यशवंत निकुळे हे सकाळी सव्वासात वाजता आपल्या मोटारीतून जात असताना विरुद्ध बाजूने दुचाकीवर प्रवास करणाऱ्या शिक्षक डॉ राहुल सिंग यांच्या दुचाकीला कट लागला असता दोघांमध्ये वाद झाला यादरम्यान जाब विचारणाऱ्या डॉ राहुल सिंग यांना शिवीगाळ करत यशवंत निकुळे यांनी गाडीच्या डॅशबोर्डातुन पिस्तुल काढत माझ्यावर रोखून धरल्याचा आरोप डॉ राहुल सिंग यांनी केला होता. त्याचबरोबर गाडीभोवती लोक जमल्याने त्यांनी पिस्तुल पुन्हा डॅशबोर्डाच्या ड्रॉवरमध्ये ठेऊन निकुळे निघून केल्याचे देखील डॉ सिंग म्हणाले होते. याप्रकरणी माजी नगरसेवक यशवंत निकुळे यांच्याविरुद्ध इंदिरानगर पोलीस ठाण्यात अदखलपात्र गुन्ह्याची नोंद करण्यात आली होती. मुख्य म्हणजे महानगर पालिकेच्या निवडणुका तोंडांवर असल्याने या प्रकरणाला वेगळे वळण लागत सोशल मीडियावर हा प्रकार मोठ्याप्रमाणात व्हायरल करण्यात आला होता.यावेळी सामान्य नागरिकांनी निकुळे यांना पाठिंबा देत निकुळे पिस्तुल जवळ ठेवतील अथवा कुणावर रोखतील हे खोटे असल्याची देखील चर्चा करत होते. निकुळे यांनी देखील सिंग यांनी आपल्याला जातीवाचक शिवीगाळ केल्याचा आरोप केला होता. त्यानंतर तब्बल 5 दिवसांनी या घडलेल्या वादावर पडदा पडला असून हा वाद गैरसमजातुन झाल्याचे म्हणत डॉ राहुल सिंग यांनी आपली तक्रार मागे घेतली आहे. अखेर दोघांनी भेटून आपापसातील वाद मिटवता घेतल्याने पोलिसांनी त्या पध्दतीचा जबाब सिंग यांच्याकडून लिहून घेत या वादावर अखेर पडदा टाकला आहे.
