आमदार देवयानी फरांदे यांनी अधिवेशनात मांडली होती लक्षवेधी
नाशिक : शहरात एक विचित्र प्रकार घडला असून चक्क स्वच्छता ठेकेदारच सफाई कर्मचाऱ्यांकडून खंडणी वसूल करत असल्याचा प्रकार समोर आला आहे. याप्रकरणी आमदार देवयानी फरांदे यांनी सफाई कर्मचाऱ्यांबरोबर मनपा आयुक्त मनीषा खत्री यांची भेट घेत घडलेला प्रकार सांगितल्यानंतर त्या ठेकेदारावर गुन्हा दाखल करण्याचे आदेश देण्यात आले आहेत. मिळालेल्या माहितीनुसार दोन ते तीन दिवसांपूर्वीच पगार मिळाल्यानंतर सफाई कर्मचाऱ्यांकडून प्रत्येकी पाच हजार तीनशे रुपये खंडणी वसूल केल्याचा आरोप या ठेकेदारावर करण्यात आला आहे. यानिमित्ताने महानगरपालिका हद्दीत काम करणाऱ्या ठेकेदार सफाई कर्मचाऱ्यांकडून दर महिन्याला खंडणी स्वरूपात रक्कम वसूल करत असल्याचा गंभीर प्रकार उघडकीस आला आहे.ज्या कर्मचाऱ्यांनी ही रक्कम देण्यास नकार दिला त्यांची बदली ठेकेदाराने दुसऱ्या ठिकाणी केली असल्याची माहिती समोर आली आहे. मुख्य म्हणजे स्वच्छता ठेकेदारामार्फत कर्मचाऱ्यांकडून कशा प्रकारे वसुली केली जात आहे. या पुराव्यांचा पेन ड्राइव्हच पावसाळी अधिवेशनाच्या सभागृहात आमदार फरांदे यांनी दाखवत कारवाईची मागणी केली होती. ज्यामध्ये कंत्राटी कर्मचाऱ्यांकडून पैशांची वसुली होत असल्याचे स्टिंग ऑपरेशनचे व्हिडीओ पुरावे म्हणून दाखवले होते. हे प्रकरण अत्यंत गंभीर असून सरकारने तातडीने हस्तक्षेप करण्याची मागणी त्यांनी केली होती. या प्रकारामुळे सफाई कर्मचाऱ्यांमध्ये संतापाचे वातावरण निर्माण झाले आहे. याविरोधात कर्मचाऱ्यांनी आमदार देवयानी फरांदे यांच्या नेतृत्वाखाली मनपात धडक भेट दिली. त्यानंतर खंडणी वसुली प्रकरणाची नोंद संबंधित पोलीस ठाण्यामध्ये करण्याचे निर्देश मनपा आयुक्तांनी दिले याचबरोबर भद्रकाली पोलीस ठाण्याचे वरिष्ठ पोलीस निरीक्षक राकेश चौधरी यांना तातडीने बोलावून घेत प्रकरणाची सविस्तर माहिती देण्यात आली असून कारवाई करण्याचे आदेश देण्यात आले आहेत.
