१२ सप्टेंबरला काढणार संयुक्त मोर्चा
नाशिक : संपूर्ण महाराष्ट्रात महाराष्ट्र नवनिर्माण सेना व ठाकरे गटाची शिवसेना एकत्र येऊन महानगरपालिका निवडणुका लढवण्याच्या चर्चा सुरू असताना नाशकात मात्र मनसे आणि ठाकरे गटाची शिवसेना एकत्र येणार आहेत त्याला कारण म्हणजे ‘मोर्चा’ शहरात एमडी ड्रग्ज, कोकेन, महिलांवर अत्याचारांसह गुन्हेगारी वाढत आहे. तसेच हनीट्रॅप प्रकरणामुळे देखील नाशिकची बदनामी होत आहे. त्यामुळे हनीट्रॅपची चौकशी करण्यासह, शेतकऱ्यांच्या विविध समस्या याकडे प्रशासनाचे लक्ष वेधण्यासाठी नाशिकमध्ये १२ सप्टेंबर रोजी ठाकरे गटाची शिवसेना आणि महाराष्ट्र नवनिर्माण सेनेचा संयुक्त मोर्चा निघणार आहे. मनसेच्या मध्यवर्ती कार्यालयात शिवसेना ठाकरे गट आणि महाराष्ट्र नवनिर्माण सेनेच्या पदाधिकाऱ्यांची संयुक्त बैठक पार पडली. या बैठकीत मनसेचे प्रदेश सरचिटणीस दिनकर पाटील, प्रदेश उपाध्यक्ष सलीम शेख, जिल्हाध्यक्ष अंकुश पवार, शिवसेना जिल्हाध्यक्ष डी. जी. सुर्यवंशी, मनसे शहराध्यक्ष सुदाम कोंबडे, महानगरप्रमुख गीते, ग्रामीण संपर्कप्रमुख जयंत दिंडे, माजी नगरसेविका सुजाता डेरे आदी पदाधिकारी उपस्थित होते.बैठकीत दोन्ही पक्षांच्या पदाधिकाऱ्यांनी मोर्चाच्या विषयांवर चर्चा केली. यामध्ये कांद्याच्या घसरलेल्या दरांचा प्रश्न, खत-बियाण्यांमधील गैरव्यवहार, नाफेडमधील कथित भ्रष्टाचार, प्रभाग रचनेतील फेरफार, महापालिकेतील निविदा प्रक्रियेतील अपारदर्शकता, पाणीटंचाई, खड्डे, तसेच उद्याने आणि जॉगिंग ट्रॅकची झालेली दुरवस्था,काळ्या यादीतील ठेकेदारांना पुन्हा देण्यात येत असलेली कामे, स्मार्ट सिटीसह कुंभ प्रकल्पाची ऑडिट चौकशी, शेतकऱ्यांचे प्रश्नांसह कर्जमाफीचे प्रलंबित प्रकरणे, पिकविमा योजनेतील घोटाळ्याची चौकशी करणे यासह इतर मागण्यांसाठी मोर्चा काढण्यात येणार असल्याचे मनसेचे प्रदेश सरचिटणीस दिनकर पाटील आणि शिवसेना जिल्हाध्यक्ष डी. जी. सुर्यवंशी यांनी सांगितले.संयुक्त मोर्चाच्या तयारीसाठी पदाधिकारी, समर्थकांना माहिती देण्यासाठी १४ ऑगस्टपासून ते १० सप्टेंबरपर्यंत २२ बैठकांचे आयोजन करण्यात आले असल्याची माहिती देण्यात आली.मोर्चाची सुरुवात अनंत कान्हेरे मैदानावरून होऊन जिल्हाधिकारी कार्यालयावर समाप्ती होणार आहे. या मोर्चासाठी मनसे प्रमुख राज ठाकरे आणि शिवसेना पक्षप्रमुख उद्धव ठाकरे यांना निमंत्रण देण्यात येणार असून, जिल्हाभरातून कार्यकर्त्यांची उपस्थिती राहण्याची शक्यता यावेळी व्यक्त करण्यात आली.
