नागरिकांना तब्बल आठ लाखांचा गंडा
नाशिक : सायबर गुन्हे दिवसेंदिवस धोकादायक ठरत असून असाच प्रकार नाशिक शहरात सुरू असल्याने नागरिकांनी सावध असणे गरजेचे आहे. गेल्या काही दिवसांपासून नागरिकांना मोबाईलवर एमएनजीएल या गॅस पुरवठा करणाऱ्या कंपनीच्या नावाने खोटा मेसेज पाठवून तब्बल आठ लाखांचा गंडा घालण्यात आल्याची घटना पोलिसांच्या निर्दशनास आली आहे. शहरातील एमएनजीएलच्या ग्राहकांना त्यांच्या व्हॉट्सऍपवर एक बनावट संदेशाबरोबरच एपीके नावाची छुपी लिंक पाठवून ती डाउनलोड करण्यास सांगून सायबर गुन्हेगारांकडून बँक साफ केली जात असल्याची धक्कादायक घटना समोर आली आहे. महिनाभरात एमएनजीएल च्या चौदा ग्राहकांना आठ लाख 22 हजारांचा गंडा घालण्यात आला आहे. याबाबत पोलिसांनी नागरिकांनी सतर्क राहण्यास सांगितले आहे. मुख्य म्हणजे या सायबर गुन्हेगारांकडे आधीच एमएनजीएल ग्राहक क्रमांक, शहराचे नाव, गॅस बिलाची रक्कम अशी सर्व मूळ माहिती असल्याचेही समोर आले आहे. त्यामुळे व्हॉट्सऍपवर प्राप्त होणाऱ्या संदेशाकडे किंवा अनोळखी लिंक मेसेजकडे दुर्लक्ष करण्याचे आवाहन सायबर पोलिसांनी केले आहे.
