खंडणीखोर तरुण पोलिसांनी केला गजाआड
नाशिक : माजी उपमुख्यमंत्री आणि राष्ट्रवादी काँग्रेसचे ज्येष्ठ नेते छगन भुजबळ यांना एक कोटी रुपयांची खंडणी मागितल्याचा प्रकार समोर आल्यानंतर राजकीय क्षेत्रात मोठी खळबळ उडाली होती मात्र प्रकरणी नाशिक पोलिसांनी सापळा रचून संबंधित आरोपीला अटक करण्यात यश मिळविले आहे . मिळालेल्या माहितीनुसार छगन भुजबळ यांचे खासगी सहाय्यक संतोष गायकवाड यांना अनोळखी क्रमांकावरून वारंवार कॉल येत होते. फोन करणारा इसम स्वतःला आयकर अधिकारी सांगून त्र्यंबकेश्वर येथील फार्म हाऊसवर रेड पडणार असल्याची धमकी देत मदतीच्या मोबदल्यात १ कोटी रुपये मागत होता. पैसे न दिल्यास कारवाई करण्याची धमकी त्याने गायकवाड यांना दिली होती. अखेर या घटनेची माहिती नाशिक पोलीस आयुक्त संदीप कर्णिक यांना देण्यात आली.त्यानंतर पोलीस उप-आयुक्त (गुन्हे) प्रशांत बच्छाव यांना कारवाईचे आदेश देण्यात आले
त्यानुसार वरिष्ठ पोलीस निरीक्षक मधुकर कड यांच्या मार्गदर्शनाखाली पथकाने सापळा रचत गायकवाड यांना गुजरातच्या धरमपूर येथे बोलावून आरोपीस पैसे देण्यासाठी आणण्यास सांगितले. त्यानुसार पोलिसांनी डमी नोटा आणि काही खरी रक्कम पंच साक्षीदारांच्या माध्यमातून आरोपीकडे देण्याचे ठरवले.धरमपूर येथे आरोपीची वाट पाहूनही तो न आल्याने पथक परतीच्या मार्गावर असताना आरोपीने पुन्हा संपर्क साधून करंजाळी येथील हॉटेल रितम व्हॅली येथे येण्यास सांगितले. येथे सापळा लावून पोलीसांनी संशयित आरोपी राहुल दिलीप भुसारे (वय २७, रा. करंजाळी, ता. पेठ) यास रंगेहाथ अटक केली. आरोपीकडून एक होंडा शाईन मोटारसायकल, मोबाईल फोन, ५०० रुपयांच्या ६० खऱ्या नोटा, तसेच खेळण्यातल्या नोटांचे १५ बंडल (एकूण अंदाजे ८५,५०० रुपये किंमतीचा मुद्देमाल) जप्त करण्यात आला आहे. या प्रकरणी अंबड पोलीस ठाण्यात गुन्हा दाखल करण्यात आला असून पुढील तपास अंबड पोलीस करत आहेत. पोलीस आयुक्त संदीप कर्णिक, पोलीस उप-आयुक्त (गुन्हे) प्रशांत बच्छाव, सहायक पोलीस आयुक्त संदीप मिटके यांच्या मार्गदर्शनाखाली ही कारवाई करण्यात आली. राहुल हा उच्चशिक्षित असून त्याचे यापुर्वी कुठलेही गुन्हेगारी रेकॉर्ड नसून केवळ झटपट पैसे कमविण्याच्या उद्देशाने त्याने हा प्रकार केला असून आरोपी हा फोन करण्यासाठी स्वतःचा मोबाईल वापरत नव्हता. तो एखाद्या हॉटेलमधील ग्राहकाचा किंवा ट्रक ड्रायव्हर यांचा फोन वापरायचा. त्यामुळे त्याला पकडायला थोडा उशीर झाला, अशी माहिती पोलिसांनी दिली.
