लष्कर-ए-तैयबाचा कुख्यात दहशतवादी सैफुल्ला खालिद ठार
वृत्तसंस्था : पाकिस्तानच्या भूमीत आज भारताचा आणखी एक शत्रू मारला गेल्याची माहिती समोर येत असून अज्ञात हल्लेखोराने लष्कर-ए-तोयबाचा टॉप कमांडर अबू सैफुल्लाहचा खात्मा केला आला आहे. हा लष्कर-ए-तोयबाला मोठा धक्का मानला जात आहे. 2001 मधील सीआरपीएफ कॅम्प रामपूर दहशतवादी हल्ला 2005 मधील बंगळूरूमधील दहशतवादी हल्ला आणि 2006 मध्ये नागपूरमधील राष्ट्रीय स्वयंसेवक संघ मुख्यालयाजवळ झालेल्या हल्ल्यांचा तो मास्टरमांईड होता. गेल्या अनेक वर्षांपासून ते नेपाळमध्ये नाव बदलून राहत होता. सैफुल्लाह भारताविरुद्ध अनेक दहशतवादी कारवायांमध्ये सहभागी होता. सैफुल्ला उर्फ विनोद कुमार उर्फ मोहम्मद सलीम उर्फ खालिद उर्फ वनियाल उर्फ वाजिद उर्फ सलीम भाई अशी त्याची अनेक नावं आहेत. सैफुल्ला नेपाळमध्ये लष्कर-ए-तैयबाच्या संपूर्ण दहशतवादी मॉड्यूलचे व्यवस्थापन करत असे. सैफुल्लाहचे मुख्य काम लष्कराच्या दहशतवादी कारवायांसाठी कॅडर आणि आर्थिक मदत पुरवणे होते. सैफुल्लाने एका नेपाळी नागरिक महिलेशी लग्न देखील केले होते. तो लष्कर आणि जमात- उद- दावासाठी भरती आणि निधी संकलनाचे काम करायचा. अलिकडेच त्याने पाकिस्तानच्या सिंध प्रांतातील बदिन जिल्ह्यातील माटली येथे आपले लपण्याचे ठिकाण बनवले होते. तिथून, तो लष्कर-ए-तैयबा, संयुक्त राष्ट्रांनी बंदी घातलेला पाकिस्तानी दहशतवादी गट आणि त्याची आघाडीची संघटना जमात-उद-दावासाठी काम करत होता. या संघटनांचा उद्देश दहशतवादी कारवायांसाठी भरती करणे आणि निधी उभारणे हा आहे. दहशतवादी सैफुल्लाच्या मृत्यूनंतर लष्कर ए तोयबाला मोठा धक्का बसला असून त्याला अज्ञात व्यक्तीने बंदुकीने गोळ्या झाडल्या,या गोळ्या कुणी झाडल्या याची माहिती कुणालाही मिळू शकली नाही.
