अवघ्या काही तासात गुन्हे शाखा युनिट 1 पथकाने संशयितांना ठोकल्या बेड्या
नाशिक : शहरात अगदी किरकोळ कारणांवरून खुनाचे प्रकार नित्याचेच झाले असून असाच प्रकार पांडवलेणीजवळ घडला असून मित्राच्या कबुतरांच्या पेटीतून दोन कबुतर चोरून दुसऱ्याच्या पेटीत टाकल्याच्या कारणाने भांडण काढत एका तरुणाची धारदार शस्त्राने हल्ला चढवत हत्या करण्यात आली. तर दुसरा तरुण गंभीर जखमी आहे. मुख्य म्हणजे या हत्याकांडात अल्पवयीन मुलांचा समावेश आहे. मिळालेल्या माहितीनुसार रविवारी रात्रीच्या सुमारास रामदास उर्फ रामा नारायण बोराडे (20 रा डेमसे मळा) व राजेश बोराडे हे दोघे पांडवलेणीच्या पायथ्याजवळ बसलेले होते. यादरम्यान त्यांच्याच ओळखीचे संशयित शौकत फरीद शेख (19 रा फाळके स्मारक जवळची चाळ) नौशाद सय्यद (19 रा. सिन्नर) नफिस उर्फ नफ्या रफिक सय्यद (22 रा. ज्ञानेश्वर नगर) कार्तिक रंगनाथ भडांगे (19,सिहस्थ नगर सिडको) विजय सुनील माळेकर(19 रा पाथर्डी फाटा) रोहित चंद्रकांत पालवे (18 रा पांडवलेणी) नितीन विठ्ठल घुगे (19 रा पाथर्डीफाटा) व त्यांचे काही अल्पवयीन मित्र त्याठिकाणी आले. यावेळी मद्यप्राशन करत एकमेकांशी कुरापत काढत शिवीगाळ करून वाद घालण्यास सुरवात केली. यादरम्यान शौकत,रोहित यांनी त्यांच्या कंबरेला असलेले धारदार सुरे उपसत रामा व राजेश बोराडे यांच्यावर वार करण्यास सुरुवात केली.यावेळी मोठ्या प्रमाणात रक्तस्राव झाल्याने रामा बोराडे याचा मृत्यू झाला तर राजेश बोराडे गंभीर जखमी झाला. याचवेळी यातील संशयितांनी परिसरात असलेल्या सोसायटीत घुसत तलवारीने वाहनांच्या काचा फोडत मोठ्याप्रमाणात दहशत माजविली. इंदिरानगर पोलीस ठाण्यात साहिल सिंग (20 रा अंबड) यांच्या फिर्यादीवरून आठ जनांविरोधात खुनाचा गुन्हा दाखल करण्यात आला आहे. उपायुक्त प्रशांत बच्छाव, संदीप मिटके यांच्या मार्गदर्शनाखाली गुन्हे शाखा युनिट -1 च्या पथकाचे वरिष्ठ पोलीस निरीक्षक मधुकर कड ,विशाल काठे, विशाल देवरे यांनी अवघ्या काही तासात चौघ्या हल्लेखोरांना बेड्या ठोकत गजाआड केले. कारण कबुतराचे…… हल्लेखोर संशयित आरोपींपैकी रामा बोराडेचा मित्र नेत्रदीपक याच्या कबुतरांच्या पेटीतून हल्लेखोरांच्या टोळीतील विजय माळेकर यांनी दोन कबुतर काही दिवसांपूर्वी काढून स्वतःच्या पेटीत नेऊन ठेवले होते. या कारणासह दारू पिण्यावरून वाद झाले. या वादातून रामाला हल्लेखोराने ठार मारल्याचे पोलिसांनी सांगितले.
