सिडकोतील गुन्हेगारी व भाईगिरी पुन्हा चर्चेत
नाशिक : शहरात होळीचा सण नागरिक उत्सवात साजरा करत असतानाच सिडको परिसरात तरुणाचा धारदार शस्त्राने वार करून खून करण्यात आल्याने परिसरात खळबळ उडाली आहे. मिळालेल्या माहितीनुसार सिडको परिसरातील शुभम पार्क येथील सेंट जोसेफ चर्च समोर ही घटना घडली असून सुमित सुरेश देवरे (२२) असे खून झालेल्या तरुणाचे नाव असून त्याचा मित्र अरुण वैरागड याच्याशी काही दिवसांपूर्वी भांडण झाले होते. सुमित हा डीवायइन कॉलेज, सटाणा येथे शिक्षण घेत होता. तो होळी सणाच्या निमित्ताने नाशिकला आला होता. अशातच आज रात्रीच्या दरम्यान तो शुभम पार्क येथील सेंट जोसेफ चर्च समोर आला असता अरुण वैरागड व त्याचे तीन ते चार साथीदार हे दुचाकीवरून त्या ठिकाणी आले व त्यांनी जुन्या भांडणाची कुरापत काढून सुमितवर धारदार शस्त्राने वार केले. या घटनेची माहिती मिळताच अंबड पोलीस ठाण्याचे वरिष्ठ पोलीस निरीक्षक राकेश हांडे घटनास्थळी दाखल झाले.त्यांनी लागलीच जखमी सुमितला जिल्हा रुग्णालयात उपचारासाठी दाखल केले. मात्र डॉक्टरांनी त्याला मयत घोषित केले.यावेळी परिसरामध्ये मोठ्या प्रमाणावर नागरिकांची गर्दी जमा झाली होती. यावेळी पोलिसातर्फे तत्काळ फॉरेन्सिक टीम तसेच श्वान पथकाला देखील पाचरण करण्यात आले. दरम्यान या घटनेनंतर मारेकरी घटनास्थळावरून पळून गेले असल्याने पोलिसांनी त्यांच्या शोधासाठी विशेष पथके तैनात केली तसेच सीसीटीव्ही फुटेजच्या आधारे त्यांचा शोध सुरू करण्यात आला. घटनेची माहिती समजताच पोलीस उपायुक्त गुन्हे प्रशांत बच्छाव, पोलीस उपायुक्त परिमंडळ २ मोनिका राऊत, सहाय्यक आयुक्त शेखर देशमुख, गुन्हे शाखा युनिट एकचे वरिष्ठ पोलीस निरीक्षक मधुकर कड, यांच्यासह अंबड पोलीस ठाण्याचे व गुन्हे शाखेचे पोलीस पथक घटनास्थळी तात्काळ दाखल झाले. रात्री उशिरापर्यंत अंबड पोलीस ठाण्यात याबाबत गुन्हा दाखल करण्याचे काम सुरू होते.सणासुदीच्या दिवशी घडलेल्या घटनेमुळे परिसरात एकच खळबळ उडाली आहे.मात्र पुन्हा एकदा या खुनामुळे सिडकोतील गुन्हेगारी व भाईगिरी थांबलेली नसल्याचे स्पष्ट झाले आहे.
