सिडको परिसरात भरदिवसा घडलेल्या घटनेने खळबळ
नाशिक : शहरात एक धक्कादायक घटना घडली असून सिडको परिसरात एका सोन्याच्या दुकानात भरदिवसा सशस्त्र दरोडा टाकण्यात आल्याने खळबळ उडाली आहे. मिळालेल्या माहितीनुसार अंबड शिवारातील महालक्ष्मी नगर येथील रस्त्यावरच असलेल्या ‘श्री ज्वेलर्स’ या सोने-चांदीच्या दुकानात आज दुपारी 2 वाजेच्या सुमारास ( 17 रोजी सोमवार) दोन तरुण तोंडावर रुमाल बांधून घुसले.यादरम्यान त्या तरुणांनी दुकानात असलेले दीपक घोडके व पत्नी मनीषा घोडके यांच्यावर पिस्तुल रोखुन धरले. तर त्यांचा तिसरा साथीदार दुचाकी घेऊन दुकानापासून थोड्या अंतरावर थांबलेला होता. मुख्य म्हणजे दुपारची वेळ असल्याने परिसरातील दुकाने बंद होती तर रस्त्यावर देखील वर्दळ नव्हती. याचाच फायदा घेत दरोडेखोरांनी घोडके दाम्पत्यावर मिरची स्प्रे फवारून दुकानातील 30 तोळे सोन्याचे दागिने लुटत पलायन केले.ही घटना सीसीटीव्हीत कैद झाली असून या घटनेची माहिती मिळताच अंबड पोलीस ठाण्याचे पथक घटनास्थळी पोहचले असून संशयितांचा शोध सुरू करण्यात आला आहे.गेल्या काही दिवसांपासून गुन्हेगारी घटनांमध्ये वाढ झालेली असतानाच आज ज्वेलर्स वर दरोडा पडल्याने शहरात खळबळ उडाली आहे.
