पुन्हा भाजप प्रवेशाच्या चर्चेला उधाण
नाशिक : राज्यात महायुतीची दणदणीत सत्ता आल्यानंतर अजित पवार गटाचे जेष्ठ नेते छगन भुजबळ यांचे मंत्रिपद निश्चित मानले जात असतानाच उपमुख्यमंत्री अजित पवार यांनी भुजबळ यांना धक्का देत मंत्रिपदापासून छगन भुजबळ यांना वंचित ठेवले यानंतर भुजबळ यांनी मेळावे घेत अजित पवार यांना खडे बोल सूनावत मुख्यमंत्री देवेंद्र फडणवीस यांची भेट घेतली त्यानंतर मात्र छगन भुजबळ भाजप मध्ये जाणार असल्याची चर्चा सुरू झाली .यादरम्यान अजित पवारांच्या राष्ट्रवादी पक्षाच्या फलकांवरून छगन भुजबळ यांचा फोटो गायब करण्यात आला. तर काही दिवसांपूर्वी नाशिक जिल्ह्याच्या दौऱ्यावर आलेल्या अमित शहा यांना शुभेच्छा देण्यासाठी लावण्यात आलेल्या फलकांवर फक्त छगन भुजबळ आणि अमित शहा यांची छायाचित्रे झळकली होती. यावेळी कार्यक्रमाच्या ठिकाणी अमित शहा यांनी छगन भुजबळ यांना बोलावून घेत शेजारच्या खुर्चीवर स्थान दिले होते.
आणि आता तर अजित पवार गटाच्या राष्ट्रवादीचे सरचिटणीस आणि समता परिषदेचे उपाध्यक्ष दिलीप खैरे यांच्या वाढदिवसाचे फलक नाशकात झळकले असता त्यावर राष्ट्रवादींच्या नेत्यांऐवजी चक्क पंतप्रधान नरेंद्र मोदी आणि मुख्यमंत्री देवेंद्र फडणवीस यांच्यासोबत छगन भुजबळ आणि समीर भुजबळ, पंकज भुजबळ यांची छायाचित्रे झळकल्याने नाशिक शहरात पुन्हा छगन भुजबळ भाजपच्या वाटेवर असल्याची चर्चा सुरू झाली असून आता छगन भुजबळ यांच्यानंतर त्यांच्या समर्थकांची देखील पाऊले ‘कमळाच्या’ दिशेने पडू लागली आहेत. हा एकप्रकारे राष्ट्रवादीला इशारा आहे की भविष्यात छगन भुजबळ हे भाजपात प्रवेश करणार हे येत्या काही दिवसात स्पष्ट होणार आहे.
