कुंभमेळा व महापालिका निवडणुका बघता शिंदे गटाची खेळी
नाशिक : महायुतीची सत्ता स्थापन झाल्यानंतर पालकमंत्रीपदाची घोषणा झाली आणि नाशिक जिल्ह्याच्या पालकमंत्रीपदी भाजपचे जलसंपदा मंत्री गिरीश महाजन यांची नियुक्ती झाली. मात्र उपमुख्यमंत्री एकनाथ शिंदे यांच्या नाराजीमुळे मुख्यमंत्री देवेंद्र फडणवीस यांनी पालकमंत्रीपदाला 12 तासात स्थगिती दिली. आणि राजकारणात उलट-सुलट चर्चेला सुरवात झाली.याला कारण देखील तसेच आहे. सुरवातीच्या काळात महायुतीत पालकमंत्रीपदावरून कुरबुरी सुरू असतानाच यावेळी पालकमंत्री वाटपाच्या वेळी वेगळीच गोष्ट पहायला मिळाली ती म्हणजे पहिल्यांदाच एका जिल्ह्याला दोन पालकमंत्री मिळाले आहेत.मुंबई आणि कोल्हापूरला यावेळी पालकमंत्र्यांनसोबत सहपालकमंत्री नियुक्त करण्यात आले आहेत. नेमके सहपालकमंत्र्यांना अधिकार काय असतात ? अथवा हे पद संविधानिक असते का ? यावर अजून स्पष्टता नाही. मात्र हा नवीन प्रयोग असल्याचे महायुतीचे नेते सांगत आहेत. कोल्हापूर जिल्ह्यात पहिल्यांदाच दोन पालकमंत्री नेमण्यात आले आहेत. शिंदे गटाच्या शिवसेनेचे प्रकाश आबिटकर पालकमंत्री, तर भाजपच्या माधुरी मिसाळ या सहपालकमंत्री म्हणून आता जिल्ह्याचा कारभार पाहणार आहेत.तर मुंबई उपनगरात भाजपचे अँड आशिष शेलार हे पालकमंत्री असणार तर सहपालकमंत्री मंगलप्रभात लोढा यांना करण्यात आले. काही दिवसांत महापालिका निवडणूका लागण्याची शक्यता बघता भाजपाने ही चाल खेळली असण्याची शक्यता असून मुख्यमंत्रीपदानंतर उपमुख्यमंत्रीपदी एकनाथ शिंदे विराजमान झाले आणि शिंदे गटाच्या कार्यकर्त्यांमध्ये चलबिचल सुरू झाली ती थांबविण्यासाठी व आगामी महापालिका निवडणुका व नाशिक शहरातील कुंभमेळा बघता उपमुख्यमंत्री एकनाथ शिंदे हे मुख्यमंत्री देवेंद्र फडणवीस यांच्यावर दबाव गट बनवत दादा भुसे यांना सहपालकमंत्री बनवण्याची शक्यता असून असे झाल्यास नाशिक जिल्ह्याला दोन पालकमंत्री मिळू शकतात गिरीश महाजन हे पालकमंत्री तर दादा भुसे हे सहपालकमंत्री असू शकतात यावर येत्या दोन दिवसात मुख्यमंत्री देवेंद्र फडणवीस निर्णय घेणार असल्याची चर्चा आहे. असे झाल्यास पहिल्यांदाच नाशिक जिल्ह्याला दोन पालकमंत्री मिळतील.
