मतांचा वाढलेला टक्का महाविकास आघाडीला बसला धक्का
नाशिक : नाशिक मध्य मतदारसंघ हा आरोप-प्रत्यारोपाने गाजला अत्यंत हॉट मतदारसंघ म्हणून मध्य कडे बघितले जात होते या मतदारसंघात भाजप महायुतीच्या प्रा.देवयानी फरांदे आणि ठाकरे गटाच्या शिवसेना व महाविकास आघाडीच्या वतीने माजी आ.वसंत गीते हे निवडणुकीच्या रिंगणात होते. या ठिकाणी फरांदे आणि गीतेंमध्ये शेवटपर्यंत काट्याची लढत झाली. जुन्या नाशिकमधील काही जागांवर वसंत गीते यांना जास्तीचे मते पडत होती. सुरवातीच्या काही फेऱ्यांमध्ये गीते यांना फरांदे यांच्या पेक्षा जास्त मतदान पडत होते. मात्र देवयानी फरांदे यांनी टपाली मतदानापासून आघाडी मिळवली होती. त्याचबरोबर 22 फेऱ्यांमध्ये फरांदे या गीते यांच्यापेक्षा पुढेच राहिल्या या चुरशीच्या लढतीत अखेर भाजपच्या देवयानी फरांदे यांनी बाजी मारत विजय मिळविला. ड्रग्ज प्रकरणात झालेला नकारात्मक प्रचार, भाजपअंतर्गत विरोधाने उशिरा मिळालेल्या उमेदवारीवर मात करत त्यांनी शिवसेना ठाकरे गटाचे वसंत गिते यांचा १७ हजार ८३५ मतांनी पराभव केला. या मतदारसंघात पाच महिन्यांपूर्वी झालेल्या लोकसभेचे चित्र पूर्णपणे वेगळे होते. लोकसभा निवडणुकीत ठराविक मतदानकेंद्रांवर महाविकास आघाडीला जे एकगठ्ठा मतदान झाले होते तो ट्रेंड यावेळी चाललेला दिसला नाही. लोकसभा निवडणुकीत महाविकास आघाडीने 4000 हजार मतांची आघाडी घेतली होती. त्यावेळी 1 लाख 86 हजार 422 इतके मतदान झाले होते. या निवडणुकीत 1 लाख 99 हजार मतदारांनी मतदान केले मात्र लोकसभेपेक्षा यावेळी चित्र खूपच वेगळे दिसले त्याचबरोबर वाढलेल्या मतांचा टक्का महाविकास आघाडीच्या यशाला धक्का देणारा ठरला आणि देवयानी फरांदे यांनी हॅट्रिक केली. यामध्ये देवयानी फरांदे या सलग दोनदा आमदार राहिल्याने सर्वच समाजाबरोबर त्यांचा संपर्क कायम होता त्याचबरोबर मतदारसंघात त्यांनी केलेली कामे ही त्यांची जमेची बाजू ठरली त्याचबरोबर पंतप्रधान नरेंद्र मोदी, उपमुख्यमंत्री देवेंद्र फडणवीस यांच्या झालेल्या सभा फायदेशीर ठरल्या त्याचबरोबर हिंदुत्व आणि लाडक्या बहिणी या मोठ्याप्रमाणात देवयानी फरांदे यांच्यामागे उभ्या राहिल्या. तर दुसरीकडे महाविकास आघाडीचे उमेदवार वसंत गीते यांच्या मागे असलेली जुन्या कार्यकर्त्यांची फळी कुठेही प्रचारात दिसली नाही. महाविकास आघाडीने एकत्रित व संघटिरित्या कुठेही काम दिसले नाही. मोजक्या कार्यकर्त्यांवर विश्वास ठेवणे भोवले. पराभूत उमेदवार आणि त्यांना मिळालेली मते– वसंत गीते (ठाकरे गटाची शिवसेना) 87,151, रवींद्र औटे (बसपा) 900 नीतीन रेवगडे (निर्भय पार्टी) 435 मुशीर सय्यद (वंचित बहुजन) 3062 अवंतीका घोडके (अपक्ष) 104 प्रकाश कांजोळे (अपक्ष) 163 राजू सोनवणे (अपक्ष) 96 वसीम शेख (अपक्ष) 477 सचिनराजे देवरे (अपक्ष) 195 नोटा — 1,644
