विधानसभेच्या निवडणुकीत मनसेला मोठे अपयश
नाशिक : महाराष्ट्र विधानसभेच्या निवडणुकीत महाविकास आघाडीचा धुव्वा उडवत महायुतीने मोठे यश प्राप्त केल्याचे चित्र आहे. यामध्ये महाराष्ट्र नवनिर्माण सेनेला विधानसभा निवडणुकीत खाते देखील उघडता न आल्याने याची चर्चा असतानाच मनसे प्रमुख राज ठाकरे यांची अवघ्या तीन ओळींची प्रतिक्रिया समोर आली आहे. आज आलेल्या निकालामुळे महाविकास आघाडीला मोठा धक्का बसला असून लोकसभेत मिळाल्या यशानंतर मात्र विधानसभेत त्यांना सपाटून हार पत्करावी लागल्याचे चित्र आहे. तर दुसरीकडे महायुतीने नेत्रदीपक कामगिरी करत सर्वांचेच डोळे दिपवले आहेत. मुख्य म्हणजे महाविकास आघाडीत विरोधी पक्षनेते पदासाठी असलेला 29 हा आकडा देखील कुठल्याही घटक पक्षाला पार करता आलेला नाही.त्यामुळे हा निकाल धक्कादायक असल्याची चर्चा सुरू आहे. विशेष म्हणजे या निवडणुकीत मनसेला खाते देखील उघडता आले नाही उलट मनसेचे एकमेव आमदार असलेले राजू पाटील यांचा या निवडणुकीत पराभव झाला आहे.याठिकाणी शिंदे गटाच्या शिवसेनेला यश मिळाले आहे (कल्याण-ग्रामीण) मनसेला कुठेही यश मिळाले नसल्याने यावर राज ठाकरे यांची प्रतिक्रिया समोर आली असून राज ठाकरे यांनी ‘एक्स’वर अवघ्या तीन अक्षरांत प्रतिक्रिया दिली आहे. “अविश्वसनीय ! तूर्तास एवढेच…”, अशी प्रतिक्रिया राज ठाकरे यांनी दिली आहे.
