पैसे ठाण्यातील उद्योजकाचे, प्रकरण आयकर विभागाकडे
नाशिक: विधानसभेच्या निवडणुकीला अवघे काही तास शिल्लक राहिले असताना जिल्ह्यात विविध ठिकाणी मोठी कारवाई करण्यात येत असून त्यात रोख रक्कम, दारू, महागडे धातू, अशा विविध वस्तू जप्त करण्यात येत आहे. यासाठी ऑनलाईन ॲप्स, दूरध्वनीवरही तक्रारी प्राप्त होत आहेत. सोमवारी सकाळच्या सुमारास पाथर्डी फाटा येथील एका नामांकित हॉटेलमध्ये थांबलेल्या जयंत साठे यांच्याकडे मोठ्या प्रमाणावर रोख रक्कम असल्याची माहिती नाशिक पश्चिम मतदार संघाच्या सहाय्यक निवडणूक अधिकारी सुनीता कुमावत यांना माहिती मिळाली. त्यानंतर त्याची खात्री करण्यासाठी निवडणूक विभागाने भरारी पथकासह हॉटेलमध्ये छापा टाकल्यानंतर त्यात सत्यता आढळून आली. रूममध्ये पहाणी केली असता तेथे जयंत साठे नामक व्यक्ती मुक्कामी असल्याचे निदर्शनास आले. भरारी पथकास येथे 1 कोटी 98 लाख रुपये मिळून आले. ही रक्कम आपण का बाळगत आहात याची विचारपूस केली असता साठे यांनी आपण उद्योजक असून व्यावसायिक कामकाजासाठी रक्कम आणल्याचे भरारी पथकास सांगितले. मात्र त्यासाठी ठोस कारण न दिल्याने ही रक्कम निवडणूक आयोगाच्या कोषागार मध्ये जमा करण्यात आली. ही कारवाई सहाय्यक खर्च निरीक्षक दीपक गवळी यांच्या उपस्थित करण्यात आली. या कारवाईत भरारी पथकाचे वाय पी बिन्नर, दिलीप सूर्यवंशी, निलेश वाघ वैजनाथ झुंगे, पोलीस हवालदार सुधाकर आव्हाड, कॉन्स्टेबल प्रकाश नागरे, यांनी सहभाग घेतला या संपूर्ण कारवाईचे व्हिडिओ चित्रकारण करण्यात आले आहे जिल्हा निवडणूक अधिकारी जलद शर्मा यांच्या मार्गदर्शनानुसार 125 नाशिक विधानसभा मतदारसंघाच्या निवडणूक निर्णय अधिकारी श्रीमती शुभांगी भारदे यांच्या नियंत्रणाखाली पूर्ण करण्यात आली. कशी होती रक्कम एका बॅगेत 500, 200 आणि 100 रुपयांच्या 97 लाख 90 हजार रुपयांच्या नोटा आढळल्या. तर दुसऱ्या बॅगेत पाचशे रुपयांच्या नोटाचे 195 बंडल आढळले. त्यात 97 लाख 50 हजार रुपये होते. टेबलच्या ड्रॉवरमध्ये दोन लाख 60 हजार रुपये सापडले यात एकूण 1 कोटी 98 लाख रुपयांची रोख रक्कम पथकास मिळून आली.
