नाशिक : स्थायी समिती सभापती पदाची निवडणूक दिनांक 25 रोजी होणार आहे. त्यासाठी आज सोमवार ( दिनांक 23) उमेदवारी अर्ज दाखल करण्यात येणार आहे. त्यानिमित्ताने भाजपमध्ये जोरदार राजकीय हालचाली सुरू झाल्या आहेत त्यानुसार आगामी सिंहस्थ कुंभमेळा बघता सभापतीपद पंचवटी परिसराला देण्यात येणार असल्याची रणनीती आखली जात असल्याची माहिती मिळत आहे. मिळालेल्या माहितीनुसार स्थायी सभापती पदासाठी पंचवटी भागातील नगरसेवक मच्छिंद्र सानप यांचे नाव जवळपास निश्चित मानले जात आहे. मच्छिंद्र सानप यांनी उपमहापौर पदासाठी माघार घेतल्याने त्याची बक्षिसे त्यांना मिळण्याची दाट शक्यता आहे तर माधुरी बोलकर आणि डॉक्टर दिपाली कुलकर्णी यांची नावे देखील चर्चेत आहेत 122 पैकी 72 सदस्य म्हणजे बहुमतापेक्षा जास्तीचा आकडा असल्याने उपमहापौर पदी सानप यांची निवड पक्की होती तरी पक्षाचे आदेश आल्याने त्यांनी माघार घेतल्याने त्यांची स्थायी सभापती पदी वर्णी लागू शकते तरी देखील सोमवारी उमेदवारी अर्ज दाखल झाल्यानंतर पूर्ण चित्र स्पष्ट होणार आहे. तर पक्षाकडून एकच सभापतीपदाचा अर्ज दाखल व्हावा यासाठी प्रयत्न सुरू असल्याचे देखील माहिती मिळत आहे विरोधकांनी पुरेशा संख्याबळ अभावी उमेदवारी दाखल न केल्यास सभापती पदाची निवडणूक बिनविरोध होण्याची शक्यता आहे स्थायी समिती ही महापालिकेची अर्थवाहिनी मानली जात असल्याने आगामी आर्थिक निर्णय निविदा प्रक्रिया आणि विकास कामांच्या प्राधान्यक्रमावर या निवडीचा थेट परिणाम होणार आहे त्यामुळे सभापती पदाच्या निवडीकडे नाशिक शहराचे लक्ष लागून आहे त्याचबरोबर भारतीय जनता पार्टी बरोबर शिंदे गटाची शिवसेना सत्तेत सहभागी झाल्याने विलास शिंदे यांना उपमहापौर पद मिळाले आहे आता पाठिंबा देणाऱ्या अजित पवार गटाच्या राष्ट्रवादीला स्थायी समिती सभापती पद मिळावे अशी मागणी केली जात आहे. स्थायी समितीत अजित पवार गटाच्या राष्ट्रवादीला समर्थन देणारे अपक्ष मुकेश शहाणे हे सदस्य आहेत.
