अजित पवार सहाव्यांदा होणार उपमुख्यमंत्री
नाशिक : आज महाराष्ट्राचे मुख्यमंत्री म्हणून देवेंद्र फडणवीस हे सायंकाळी पाच वाजता आझाद मैदानात शपथ घेणार आहेत तर त्यांच्याबरोबर एकनाथ शिंदे आणि अजित पवार देखील उपमुख्यमंत्री पदाची शपथ घेणार आहेत. यामध्ये अजित पवार उपमुख्यमंत्री म्हणून सहाव्यांदा शपथ घेणार आहेत. त्यामुळे राज्यात सर्वाधिक वेळा उपमुख्यमंत्री होणारे अजित पवार हे एकमेव नेते ठरले आहेत.1991 मध्ये अजित पवार पहिल्यांदा महाराष्ट्र विधानसभेचे सदस्य म्हणून निवडून आले. त्यानंतर ते अर्थमंत्री, जलसंपदामंत्री, ऊर्जामंत्री झाले. कॉग्रेस आघाडीची सत्ता असताना अजित पवार दोनदा उपमुख्यमंत्री झाले तर 2019 मध्ये अजित पवार यांनी भाजप बरोबर जात पहाटे उपमुख्यमंत्री पदाची शपथ घेतली होती. त्यानंतर तीन दिवसात त्यांना राजीनामा द्यावा लागला होता. त्यानंतर काही दिवसातच महाविकास आघाडीच्या सरकारमध्ये ते उपमुख्यमंत्री झाले. मात्र एकनाथ शिंदे यांनी शिवसेनेत बंड केल्यानंतर महाविकास आघाडीचे सरकार कोसळले आणि अजित पवार विरोधी पक्षनेते झाले. त्यानंतर जुलै 2023 मध्ये अजित पवार यांनी राष्ट्रवादीत बंड करत शिंदे सरकार मध्ये सामील होत ते महायुतीच्या सरकारमध्ये उपमुख्यमंत्री म्हणून शपथ घेतली. या सर्व वाटचालीत जलसंपदामंत्री असताना त्यांच्यावर सिंचन घोटाळ्याचे आरोप करण्यात आले. आणि आज पुन्हा एकदा महायुतीच्या सरकार मध्ये अजित पवार हे शपथ घेत असल्याने राजकीय वर्तुळात त्यांच्या उपमुख्यमंत्री पदाची चर्चा सुरू आहे
