नाशिकरोड परिसरातून संशयित गजाआड
नाशिक : छोटे मोठे भामटे आणि त्यांनी गंडवलेल्या घटना आपण नेहमी ऐकत असतो त्याच बरोबर सायबर गुन्हेगारी मुळे देखील हजारो नागरिकांचे खाते रिकामे होत लाखो रुपयांना चुना लावण्यात आलेला असतानाच नाशिक शहरातील एका भामट्याने चक्क तामिळनायडूच्या शास्त्रज्ञाची पाच कोटी रुपयांची फसवणूक केल्याचा प्रकार समोर आला आहे. मिळालेल्या माहितीनुसार एक वर्षांपूर्वी निरंजन सुरेश कुलकर्णी (रा.40 गंधर्व नगरी मोटवानी रोड) याने आपली ओळख राजकीय नेत्यांसोबत असल्याचे सांगत चेन्नई जिल्हातील रहिवासी व शास्त्रज्ञ म्हणून परिचित असलेले नरसिम्हा रेड्डी दामोदर रेड्डी यांना तुम्हाला राज्यपाल पद मिळवून देतो असे सांगून सर्व्हिस चार्ज म्हणून पंधरा कोटींची मागणी करत पाच कोटी रुपयांची रोकड घेतली यासाठी नाशकातील हॉटेलमध्ये रेड्डी यांची भेट घेण्यात आली होती.मुख्य म्हणजे एका मित्रामार्फत नाशिकमध्ये एका कार्यक्रमात रेड्डी यांची ओळख कुलकर्णी सोबत झाली होती. दरम्यान 7 फेब्रुवारी 2024 रोजी त्याने पुन्हा नरसिम्हा यांची भेट घेत बनावट कागदपत्र दाखविली नरसिम्हा व त्यांच्या नातेवाईकांकडून रोख 60 लाख रुपये व 4 कोटी 48 लाख 99 हजार 876 रुपये बँक खात्यात वर्ग करून घेतले. दोन महिन्यात ही रक्कम त्याने उकळल्याचे रेड्डी यांनी फिर्यादीत म्हटले आहे. यानंतर मध्यवर्ती गुन्हे शाखेने आपले जाळे टाकत तपास चक्रे वेगाने फिरविण्यास सुरवात केली असता तांत्रिक विश्लेषणाच्या मदतीने कुलकर्णी याचा माग काढण्यात आला त्यानंतर नाशिक रोड भागातील गंधर्व नगरी परिसरात सापळा रचून पोलिसांनी त्यास ताब्यात घेतले. निरंजन कुलकर्णी हा गंधर्व नगरी भागात मोटवानी रोडवरील श्री अपार्टमेंट मध्ये एका प्लॅटमध्ये राहतो त्याची पत्नी विभक्त असून आई-वडिलांसोबत या ठिकाणी तो वास्तव्यास आहे मध्यवर्ती गुन्हे शाखेच्या पथकाने त्याच्या घराची झडती घेतली. मात्र त्याच्या घरात काही विशेष आढळून आले नाही. नरसिम्हा यांचा विश्वास जिंकण्यासाठी बोर व्याघ्र प्रकल्पात सुमारे 100 एकर जमीन शासनाकडून भाडेतत्त्वावर घेतल्याचे निरंजन कुलकर्णी यांनी सांगितले या जमिनीच्या व्यवहाराबाबतचे भारत सरकारची मोहर असलेली बनावट कागदपत्रे दाखविली तसेच चांदशी गावात सुद्धा त्यांनी स्वतःच्या नावावर जमीन असल्याचे भासून खोटे कागदपत्र दाखवून गंडविले. त्यानंतर मात्र रेड्डी यांनी फ्रियादीत म्हटले आहे की निरंजन कुलकर्णी याने जीवे मारण्याची धमकी दिली होती. बारावी पास निरंजन ला मोठी लाईफ स्टाइल जगण्याचा शोक असल्याचे समोर आले आहे. त्याचबरोबर फिर्यादी नरसिम्हा दक्षिण भारतात वैज्ञानिक म्हणून काम करतात.
