आता शाळा भरणार सकाळी 9 वाजेनंतर
नाशिक : राज्यासह नाशिक शहरात गेल्या काही दिवसांपासून मोठ्याप्रमाणात थंडी वाढल्याने भल्या पहाटे शाळेत जाणाऱ्या विद्यार्थ्यांना त्रास सहन करावा लागत असून त्यांच्या आरोग्यावर विपरीत परिणाम होण्याची शक्यता लक्षात घेता महापालिका शिक्षण विभागाने खबरदारी घेत शाळेच्या वेळेत बदल केला आहे. पालकांच्या मागणीनुसार महापालिका क्षेत्रातील शाळांची घंटा एक तास उशिराने वाजण्यास प्रारंभ झाला आहे अर्थात मनपाच्या शाळा आता सकाळी सात ऐवजी आठ तर खाजगी शाळा नऊ वाजता भरणार आहेत. आज पासून या निर्णयाची अंमलबजावणी करण्यात आल्याची माहिती प्रशासन अधिकारी बी.टी पाटील यांनी दिली. शहरात महापालिकेच्या 100 शाळा आहेत यापैकी 88 प्राथमिक व 12 या माध्यमिक आहेत खाजगी शाळांचा आकडाही जवळपास 400 पर्यंत आहे राज्य शासनाच्या शिक्षण खात्याने दिलेल्या आदेशानुसार शहरातील प्राथमिक शाळा सकाळच्या सत्रात भरवल्या जातात महापालिका शाळांची वेळ सकाळी सात ते दुपारी साडेबारा वाजेपर्यंत असेल तर खाजगी शाळा सकाळी सात आठ किंवा नऊ वाजता भरवल्या जातात मात्र नाशकात पारा 10 अंशाच्या खाली आल्याने विद्यार्थ्यांच्या आरोग्याचा विचार करून शिक्षण विभागाने हा निर्णय जाहीर केला आहे. शहरात गेल्या काही दिवसापासून थंडीचा जोर मोठ्या प्रमाणात वाढला आहे. दोन दिवस तर सलग 9.4 इतके तापमानाची नोंद करण्यात आली महापालिकेच्या शिक्षण विभागाने शाळेच्या वेळेत बदल करण्याचा निर्णय घेतला त्यानुसार महापालिकेच्या शाळा सकाळी सात ऐवजी आठ वाजेपासून भरणार आहेत. तर खाजगी शाळांना त्यांच्या वेळेनुसार एक तास वाढ करण्याचे निर्देश मनपा शिक्षण विभागाने शाळा व्यवस्थापन समितीला दिले आहेत त्यामुळे खाजगी शाळा आता 9 वाजेपासून भरणार आहेत.
