छगन भुजबळ काय निर्णय घेतात, राजकिय वर्तुळात चर्चा
नाशिक : आज महायुतीचा मंत्रिमंडळ विस्तार झाला यामध्ये अनेक नवीन चेहऱ्यांना संधी देण्यात आली तर अनेक जेष्ठ नेत्यांना मंत्री पदावरून डावलण्यात आल्याने मोठी नाराजी बघावयास मिळाली यामध्ये अदिती तटकरे, बाबासाहेब पाटील, दत्तात्रय भरणे, हसन मुश्रीफ, नरहरी झिरवाळ, मकरंद पाटील, इंद्रनील नाईक, धनंजय मुंडे, माणिकराव कोकाटे यांना मंत्रिपद देण्यात आले तर राष्ट्रवादीचे ज्येष्ठ नेते छगन भुजबळ यांचा मंत्रिमंडळातून पत्ता कट करण्यात आल्याची माहिती समोर आल्याने भुजबळ समर्थकांमध्ये प्रचंड नाराजी पसरल्याचे चित्र आहे.देशपांडे सभागृहात पक्षाचा मेळावा आणि नवनिर्वाचित आमदारांचा सत्कार सोहळा ठेवण्यात आला होता. यावेळी राष्ट्रवादीच्या पदाधिकाऱ्यांनी व कार्यकर्त्यांनी गर्दी केली असतानाच छगन भुजबळ मात्र तिकडे फिरकलेच नाही. त्यांनी सत्काराला पाठ दाखवून आपली नाराजी व्यक्त केली.
नाराज झालेले छगन भुजबळ आता कोणता निर्णय घेणार, याकडे साऱ्यांचे लक्ष लागले आहे. काही भुजबळ समर्थकांनी नाराजी व्यक्त करत अजित पवार यांना याची मोठी किंमत चुकवावी लागेल असा इशाराच देण्यात आला आहे तर काही भुजबळ समर्थकांनी पाठीत वार केल्याचा फोटो सोशल मीडियावर ठेवल्याने राजकीय वर्तुळात चर्चेला उधाण आले आहे. त्याचबरोबर अजित पवार यांना अनेक नेते नाराज होणार असल्याची कल्पना आल्याने त्यांनी आपल्या भाषणात मंत्रिपदाची जागा कमी आहे आणि इच्छुकांची संख्या जास्त असे सांगून सर्वांना स्थान देता येणार नाही, हे स्पष्ट केले. हे सांगताना त्यांनी ज्यांना आता मंत्री केले आहे, त्यांचा कार्यकाळ अडीच वर्षांचाच असल्याचे सांगून इतरांची नाराजी दूर करण्याचा प्रयत्न केला आहे.
