शांतीगिरी महाराजांमुळे होणारी मतविभागणी विजयाचे गणित ठरवणार का ?
नासिक: लोकसभेची निवडणूक अनेक कारणांनी महाराष्ट्रभरात चर्चेत राहिली. नाशिक जिल्ह्यात महाआघाडीकडून ठाकरे गटाचे राजाभाऊ वाजे तर महायुतीकडून शिंदे गटाचे हेमंत गोडसे यांना उमेदवारी देण्यात आली. त्यामुळे सलग चौथ्यांदा उमेदवारी मिळविणाऱ्या शिंदे गटाचे विद्यमान खासदार हेमंत गोडसे यांच्यासमोर ठाकरे गटाच्या राजाभाऊ वाजे यांनी तगडे आव्हान उभे केले आहे. त्यातच स्वामी शांतिगिरी महाराजांनी रिंगणात उडी घेतल्याने हिंदुत्ववादी मतांची होणारी मत विभागणी महायुतीला अडचणीची ठरू शकते का? अथवा वंचित आघाडीकडून करण गायकर यांना मिळालेली उमेदवारी महाआघाडीला अडचणीत आणू शकते का ? हे उद्या संध्याकाळ पर्यंत स्पष्ट होईल. महाविकास आघाडीने म्हणजेच ठाकरे गटाने ऐनवेळी विजय करंजकर यांचा पत्ता कट करत त्या ठिकाणी सिन्नरचे माजी आमदार राजाभाऊ वाजे यांना उमेदवारी दिली. मात्र महायुतीत सव्वा महिने घोळ सुरू होता भाजपचे नेते अमित शहा यांनी छगन भुजबळ यांना उमेदवारीसाठी राजी केले मात्र नंतर त्यांना उमेदवारी न दिल्याने त्यांच्या समर्थकांची नाराजी कायम दिसली. ठाकरे गटाचे राजाभाऊ वाजे हे ग्रामीण भागातील नेतृत्व असून त्यांचा जनसंपर्क उत्तम आहे मुख्य म्हणजे ठाकरेंना मिळणारी सहानुभूती देखील त्यांच्या पथ्यावर पडू शकते. मात्र दुसरीकडे शहरी भागाशी संपर्क कमी असणे ही त्यांची उणीव असू शकते. तर महायुतीचे हेमंत गोडसे यांना तीन वेळा निवडणुकीचा आणि सलग दहा वर्षे केलेली कामे ही जमेची बाजू असू शकते. त्याचबरोबर केंद्र शासनाची 370 कलम, राम मंदिर, ही कामे देखील जमेची बाजू असू शकतात. नाशिक लोकसभा मतदारसंघात शहरातील तीन आमदार भाजपचे आहेत. तर राष्ट्रवादीचे दोन आणि काँग्रेसचा एक आमदार आहे मात्र यांनी लोकसभा निवडणुकीत किती सक्रिय सहभाग नोंदविला ते निकालानंतरच कळेल. त्याचबरोबर नाशिक जिल्हा हा मराठा बहुल मतदारसंघ असला तरी ओबीसी मतदारांची संख्या लक्षणीय आहे. राजाभाऊ वाजे आणि वंचित बहुजन आघाडीचे करण गायकर त्याचबरोबर महायुतीचे हेमंत गोडसे हे मराठा आहेत. त्यामुळे आता ओबीसी मते कोणाकडे जातात हे पहाणे महत्त्वाचे ठरणार आहे. छगन भुजबळ यांची नाराजी, शांतीगिरी महाराज यांची निवडणुकीतील एन्ट्री कोणाला तापदायक ठरू शकते हे निकालानंतर कळेलच
2019 मध्ये काय घडले ? हेमंत गोडसे (शिवसेना, विजयी) 5,63,599, समीर भुजबळ (राष्ट्रवादी) 2,71,395 माणिकराव कोकाटे (अपक्ष) 1,34,527 पवन पवार (वंचित बहुजन आघाडी) 1,09,981
