मुख्यमंत्र्यांच्या इशारानंतर जिल्हाधिकाऱ्यांचे मोठे आदेश
नाशिक : महाराष्ट्रातील अनेक जिल्ह्यांमध्ये मुसळधार पाऊस पडत आहे.यामुळे मोठ्या प्रमाणात जनजीवन विस्कळीत झाले आहे. अनेक ठिकाणी दरड कोसळल्याच्या घटना देखील घडल्या आहेत. तसेच अनेक ठिकाणी पुराचे पाणी गावात शिरल्याच्या देखील घटना घडत आहेत. हवामान खात्याच्या अंदाजानुसार राज्यभरात सुरू असलेले पावसाचे रुद्र रूप 8 जुलै पर्यंत असण्याची शक्यता आहे. हवामान विभागाने नाशिक जिल्ह्याला उद्या पावसाचा रेड अलर्ट जारी केला आहे. मुख्य म्हणजे नाशिक, त्र्यंबकेश्वर आणि इगतपुरी या तीन तालुक्यांमध्ये ढगफुटीसदृश्य पावसाची शक्यता वर्तवण्यात आली आहे. संभाव्य धोका लक्षात घेता मुख्यमंत्री देवेंद्र फडणवीस यांनी महत्त्वाची बैठक घेत जिल्हाधिकाऱ्यांना आपत्कालीन व्यवस्था अलर्ट मोडवर ठेवण्याचे आदेश दिले आहेत.यानंतर नाशिकचे जिल्हाधिकारी आयुष प्रसाद यांनी तातडीची पत्रकार परिषद घेतली.यावेळी बोलताना जिल्हाधिकारी म्हणाले. नाशिक, त्र्यंबकेश्वर परिसरात अतिमुसळधार पाऊस पडणार असल्याची शक्यता वर्तवण्यात आली आहे. त्र्यंबकेश्वर, इगतपुरी आणि नाशिक या तीन तालुक्यात जास्त पावसाची शक्यता आहे. पेठ, दिंडोरी, कळवण, सटाणा, बागलाण या तालुक्यांमध्येही मोठ्या प्रमाणात पाऊस पडणार आहे. पण कमी वेळात अतिमुसळधार पाऊस, ज्याला आपण ढगफुटी म्हणतो तसा पाऊस त्र्यंबकेश्वर, नाशिक आणि इगतपुरी परिसरात पडण्याची शक्यता आहे. नाशिक शहराच्या पश्चिम भागात जास्त पावसाची शक्यता आहे. हवामान विभागाकडून इशारा मिळेल तसा आपल्याला नेमका कुठे जास्त पाऊस पडणार याची माहिती अधिक स्पष्टपणे मिळेल”, असं जिल्हाधिकारी आयुष प्रसाद म्हणाले. त्र्यंबकेश्वर आणि सप्तश्रृंगी देवस्थान राहणार बंद
उद्या त्र्यंबकेश्वर देवस्थान बंद ठेवण्यात येणार आहे. आज संध्याकाळी सूर्यास्त झाल्यानंतर शेवटची पूजा राहणार आहे.त्यानंतर त्र्यंबकेश्वर देवस्थान परवापर्यंत बंद राहणार आहे. भाविकांनी उद्या त्र्यंबकेश्वरला येणं टाळावं. तसेच सप्तश्रृंगी मंदिराच्या परिसरात 65 मिमी पेक्षा जास्त पावसाची शक्यता आहे. त्यामुळे सुरक्षेच्या कारणास्तव सप्तरश्रृंगी देवस्थान उद्या बंद ठेवण्याच्या सूचना देण्यात आल्या आहेत अशी माहिती जिल्हाधिकाऱ्यांनी दिली. सर्व शाळा, महाविद्यालयांना सुट्टी जाहीर नाशिक तालुका, त्र्यंबकेश्वर आणि इगतपुरी तालुका या भागातील सर्व शाळा, कॉलेज उद्या बंद राहणार आहे. नाशिक महापालिका आयुक्त आणि महापौर शहर भागातील पूर परिस्थितीवर लक्ष ठेवत असून त्यानुसार नियोजन करणार आहेत. त्याचबरोबर नदी काठच्या गावांना हाय अलर्ट चा इशारा देण्यात आला असून शेतकऱ्यांनी देखील शेतीत टाळावे असे आव्हान करण्यात आले आहे. खाण्याच्या आणि जेवणाच्या वस्तू सोबत ठेवा…
नाशिक महापालिकेच्या महापौर हिमगौरी आडके यांनी म्हटले की, ‘हा पाऊस वाढणार आहे, वेग वाढला तर आपत्कालीन परिस्थिती निर्माण होऊ शकते. उद्या सर्व शाळांना सुट्टी देण्यात आली आहे. जिल्हाधिकारी यांनी निर्देश दिले आहेत की, जिथं शक्य आहे तिथं बाहेर पडू नका. खाण्याच्या आणि जेवणाच्या वस्तू आधीच आणून ठेवा. उद्या घराबाहेर पडण्याचे टाळा, झाड पडू शकतं असे वाटल्यास अलर्ट राहा आणि कळवा. आपत्कालीन परिस्थिती निर्माण होऊ नये यादृष्टीने काळजी घ्या.’
