ठाकरे गट व भाजपाचे कार्यकर्ते आमने-सामने
नाशिक :महाराष्ट्राला पुरोगामी महाराष्ट्र समजला जातो पण या महाराष्ट्रातील महत्त्वाचे शहर असलेल्या नाशिक शहरात आज मतदानाच्या दिवशी दोन आजी-माजी आमदार भिडल्याने परिसरात तणावाचे वातावरण निर्माण झाले होते. जुन्या नाशिक परिसरातील भद्रकाली भागातील घास बाजार येथे मतदान केंद्राबाहेर भाजपाच्या आमदार प्राध्यापक देवयानी फरांदे आणि शिवसेना ठाकरे गटाचे नेते तथा माजी आमदार वसंत गीते यांच्यात जोरदार हमरी-तुमरी झाली. यावेळी दोन्ही बाजूच्या कार्यकर्त्यांनी मोठ्या प्रमाणात घोषणाबाजी केली. मिळालेल्या माहितीनुसार घास बाजार येथील मनपाच्या अब्दुल कलाम उर्दू शाळेत शांततेत मतदानाला सुरुवात झाली होती. यावेळी मतदारांनी मोठ्या प्रमाणात गर्दी केली होती. सकाळी साडेअकराच्या सुमारास फरांदे यांनी मतदान केंद्रावर येत मतदारांकडील चिठ्ठ्या तपासण्यास सुरुवात केली. काही महिला मतदारांची ओळख तपासणी देखील त्यांनी करण्याचा प्रयत्न केला. त्यावेळी तेथे उपस्थित असलेल्या महाविकास आघाडीच्या कार्यकर्त्यांनी आक्षेप घेत मतदान केंद्रात आमदार का आल्या असा सवाल केला. त्यामुळे वादाला सुरुवात झाली. यातून दोन्ही गट एकमेकांसमोर आले यावेळी दोन्ही गटातील समर्थकांनी आरडाओरडा, घोषणाबाजी केल्यामुळे वाद वाढत असल्याचे बघून मतदारांनी मतदान केंद्रातून काढता पाय घेतला होता. यामुळे परिसरात तणाव वाढला होता.यादरम्यान सोशल मीडियात या वादाचा व्हिडीओ व्हायरल झाल्याने तणावात अजून भर पडली. या घटनेची माहिती मिळताच तेथील बंदोबस्तावरील भद्रकाली पोलिसांसह गुन्हे शाखा व सहस्त्र पोलिसांच्या पथकाने धाव घेत दोन्ही गटांमधील समर्थकांना लांब करण्यात यश मिळविले. यावेळी सहाय्यक पोलीस आयुक्त सिद्धेश्वर धुमाळ, भद्रकाली पोलीस ठाण्याचे वरिष्ठ पोलीस निरीक्षक गजेंद्र पाटील यांनी मध्यस्थी करत वसंत गीते यांना बाजूला नेले तर आमदार देवयानी फरांदे यांना देखील पोलिसांनी दुसऱ्या बाजूला नेत परिस्थितीवर नियंत्रण मिळवले .यामुळे मोठा अनर्थ टळला, शहरात दिवसभर या घटनेची चर्चा सुरू होती.
