विधी करण्याच्या नावाखाली महिलेला लॉजवर नेऊन बलात्कार
नाशिक : भोंदू बाबा अशोक खरात प्रकरण चर्चेत असतानाच आता निफाड तालुक्यातील धरणगाव (खडक) येथील एका भोंदूबाबाचा काळा कारनामा उघडकीस आल्याने नागरिकांमध्ये संताप व्यक्त करण्यात येत आहे. मिळालेल्या माहितीनुसार कौटुंबिक समस्या दूर करण्याचे आणि भूतबाधा उतरवण्याचे आमिष दाखवून एका महिलेचे लैंगिक शोषण करणाऱ्या महेशगिरी महाराज उर्फ महेश दिलीप काकडे याच्यावर लासलगाव पोलीस ठाण्यात गुन्हा दाखल करण्यात आला आहे.पीडित महिलेचे कुटुंब घरगुती ताणतणाव आणि मुलीच्या लग्नातील अडथळ्यांमुळे त्रस्त होते. यावर तोडगा काढण्यासाठी ते धरणगाव येथील महेशगिरी याच्या तथाकथित ‘प्रति गाणगापूर’ मठात गेले. यावेळी भोंदू महेशगिरीने महिलेला “बाहेरची बाधा” असल्याचे सांगून मनात भीती घातली. विधीच्या नावाखाली तिला पापनाशक कुंडात अंघोळ घालण्यास लावून, ओल्या वस्त्रानिशी उंबराच्या झाडाला फेऱ्या मारण्यास भाग पाडले त्यांनंतर काही दिवसांनी या भोंदूने पीडितेचा मोबाईल नंबर मिळवून तिला व्हॉट्सॲपवर अश्लील मेसेज पाठवण्यास सुरुवात केली. “दैवी विधी आणि मार्गदर्शनासाठी एकांतात यावे लागेल” असे सांगून त्याने पीडितेला नाशिकमध्ये बोलावून घेतले. तिथून तिला नाशिक-त्र्यंबक रोडवरील एका लॉजवर नेले. “माझ्या गळ्यात रुद्राक्ष आहे, माझ्यात दैवी शक्ती आहे, माझे कोणी काही करू शकत नाही,” अशी धमकी देऊन त्याने तिच्यावर अत्याचार केला आणि तिचे आक्षेपार्ह फोटोही काढले.पीडित महिला सुरुवातीला गप्प होती. यानंतर तिने महाराष्ट्र अंधश्रद्धा निर्मूलन समितीच्या (अंनिस) पदाधिकाऱ्यांशी संपर्क साधला. डॉ. टी. आर. गोराणे आणि कृष्णा चांदगुडे यांच्या मार्गदर्शनाखाली हा प्रकार नाशिक ग्रामीण पोलीस अधीक्षक बाळासाहेब पाटील यांच्या कानावर घालण्यात आला. पोलीस अधीक्षकांच्या सूचनेनुसार, लासलगाव पोलिसांनी घटनेचे गांभीर्य ओळखून महेशगिरी काकडे विरोधात जादू टोनाविरुद्ध कायद्यान्वये गुन्हा दाखल करण्यात आला असून पोलिस त्याचा शोध घेत आहे. या भोंदुबाबाने आणखी महिला व तरुणींचे लैंगिक शोषण केल्याची शक्यता अंनिस कार्यकर्त्यांनी व्यक्त केली आहे.
