जिल्ह्यावर नियंत्रण ठेवण्यासाठी महायुती मध्ये जोरदार रस्सीखेच
नाशिक : राज्यात महायुती बहुमताने सत्तेत आली आणि काही दिवसांच्या प्रतीक्षेनंतर मुख्यमंत्री देवेंद्र फडणवीस तर उपमुख्यमंत्री म्हणून एकनाथ शिंदे, अजित पवार यांनी शपथ घेतली. आता मात्र नाशिक जिल्ह्याच्या पालकमंत्री पदी कोण ? याची जोरदार चर्चा राजकीय वर्तुळात आहे. काल-परवा तर काही कार्यकर्त्यांनी आपापल्या नेत्यांचे भावी पालकमंत्री म्हणून शहरात फलक झळकावले यामध्ये प्रामुख्याने छगन भुजबळ, दादा भुसे, देवयानी फरांदे यांचे कार्यकर्ते अग्रभागी होते. संपुर्ण जिल्हावार नियंत्रण मिळवायचे असेल तर आपल्याच पक्षाला पालकमंत्री पद मिळावे अशी सर्वच राजकीय पक्षांची इच्छा असते. सध्या जिल्हात सात जागा जिंकून अजित पवार गटाच्या राष्ट्रवादीने आपली “दादागिरी” सिद्ध केली आहे.तर भाजपचे पाच आमदार निवडून आले आहेत. त्याखालोखाल शिंदे गटाच्या शिवसेनेचे दोन आमदार आहेत. या प्रमुख तीन पक्षांनी स्ट्राइकरेट टिकून ठेवल्याने नाशिक जिल्ह्याच्या पालकमंत्री पदासाठी या तीनही पक्षांमध्ये जोरदार रस्सीखेच होण्याची शक्यता आहे. 2014 मध्ये देवेंद्र फडणवीस राज्याचे मुख्यमंत्री असताना गिरीश महाजन नाशिक जिल्ह्याचे पालकमंत्री होते. त्यानंतर राजकीय उलथापालथ झाली आणि एकनाथ शिंदे मुख्यमंत्री झाल्यानंतर दादा भुसे हे जिल्ह्याचे पालकमंत्री झाले. मात्र आता भाजपचे देवेंद्र फडणवीस मुख्यमंत्री असल्याने गिरीश महाजन हेच पालकमंत्री होण्याची दाट शक्यता आहे. अजीत पवार गटाच्या राष्ट्रवादीला तोला-मोलाचे मंत्रिपद दिले जाईल तर जिल्हात शिंदे गटाच्या शिवसेनेचे दोन आमदार असल्याने एकाला मंत्रिपद दिल्यास पालकमंत्री साठी भाजपचा मार्ग मोकळा होऊ शकतो. त्याचबरोबर 2026-27 मध्ये होणाऱ्या सिहस्थ कुंभमेळा जिल्हास्तरीय समितीचे अध्यक्षपद गिरीश महाजन यांच्याकडे आहे. जिल्हात पालकमंत्री भुसे असताना देखील अध्यक्ष पद गिरीश महाजन यांच्याकडे गेले होते. त्याचबरोबर गिरीश महाजन यांची ओळख फडणवीस याचे संकटमोचक म्हणून असल्याने आणि ज्या पक्षाचा मुख्यमंत्री त्याचाच पालकमंत्री ही शक्यता लक्षात घेता पुन्हा एकदा नाशिक जिल्ह्याचे पालकमंत्री पद गिरीश महाजन यांच्याकडे जाण्याची शक्यता आहे.
