हत्या आणि आत्महत्येच्या सत्रामुळे इंदिरानगर भागात दहशतीचे वातावरण
नाशिक : इंदिरानगर परिसरात तरुणीची धारदार शस्त्राने हत्या करण्यात आली. या घटनेनंतर याच परिसरात काही तासांतच संशयित आरोपी तरुणानेही आत्महत्या केल्याचा धक्कादायक प्रकार समोर आल्याने परिसरात खळबळ उडाली आहे. मिळालेल्या माहितीनुसार नाशिकच्या गजबजलेल्या इंदिरानगर परिसरातील वनसंपदा सोसायटीतील उद्यानाजवळ शुक्रवारी रात्री 10.30 च्या सुमारास तरुणीच्या खुनाची घटना उघडकीस आली आहे. एकतर्फी प्रेमप्रकरणातून हा खून झाल्याचा प्राथमिक अंदाज पोलिसांनी व्यक्त केला होता. खून केल्यानंतर हल्लेखोर प्रियकर फरार झाला होता. वैष्णवी अनिल आवारे ( वय 20)असे या तरुणीचं नाव असून तिच्या एक्स बॉयफ्रेंडने असलेल्या साहिल अशोक लव्हारे याने तिची हत्या केल्याची धक्कादायक घटना उडकीस आली आहे. मयत तरुणी मूळची अंमळनेरची असून, नाशकात ती शिक्षणाकरिता कानडे रोहाऊसमध्ये पेईंग गेस्ट म्हणून राहत होती. उद्यानात मैत्रिणीसोबत बसलेली असताना संशयित तरुण आला. तिच्यासोबत बोलण्याचा प्रयत्न केला. मात्र तिनं प्रतिसाद दिला नाही. निघून जाताना संशयिताने खिशातून चाकू काढून तरुणीच्या गळ्यावर वार केले. घाव वर्मी लागल्याने ती रक्ताच्या थारोळ्यात पडली आणि जागीच तिचा मृत्यू झाला. त्यानंतर मैत्रिणीने आरडाओरड केल्यानंतर तो तिथून पळून गेला. पण जास्त लांब जाऊ शकला नाही. वैष्णवी आणि साहिल यांच्यात आधी प्रेमसंबंध होते. पण वैष्णवी दुसऱ्या मुलाशी लग्न करणार असल्याचे समजल्यामुळे साहिल प्रचंड संतापला होता. साहिल लाव्हारे याच्यासोबत वैष्णवीचा जोरदार वाद झाला. हा वाद सुरू असताना वैष्णवीच्या होणाऱ्या नवऱ्याने फोनवरून त्यांचे संभाषण ऐकलं. ‘वैशूला आज संपवलं’ असं म्हणत त्याने नवऱ्याला फोनवर विचारलं की, “तू कुठे आहेस, तुला इथे पोहोचायला किती वेळ लागेल?” पण मैत्रिणीने आरडाओरड केल्यानं लोक जमा झाली अन् साहिलने पळ काढला. पोलीस साहिलचा शोध घेत असताना शनिवारी पहाटेच्या सुमारास इंदिरानगर पोलीस ठाण्याच्या हद्दीतच वैष्णवीची हत्या केली तिथून फक्त दोन किलोमीटर अंतरावर असलेल्या इंदिरानगर जॉगिंग ट्रॅक वरील एका झाडाला साहिल लाव्हारे याचा मृतदेह गळफास घेतलेल्या अवस्थेत आढळून आला. याच रागातून आणि प्रेमात वेड्या झालेल्या साहिलने वैष्णवीचा काटा ताढला. नाशिक पोलीस संपूर्ण प्रकरणाचा अधिक तपास करत असून दोन्ही मृतदेह पोस्टमार्टेमसाठी शासकीय रुग्णालयात पाठवण्यात आले आहेत. लिव्ह-इन रिलेशनशिप’ एका तरुणाबरोबर आणि लग्न दुसर्‍या तरुणाबरोबर…. पोलीस तपासात या हत्येमागील अत्यंत धक्कादायक पार्श्वभूमी समोर आली आहे. मृत वैष्णवी आणि आरोपी साहिल हे एकमेकांच्या ओळखीचे होते आणि त्यांच्यात आधी प्रेमसंबंध होते. काही काळापूर्वी ते दोघे उमरखेड येथे ‘लिव्ह-इन रिलेशनशिप’मध्ये एकत्र राहत होते. मात्र, गेल्या काही महिन्यांपासून त्यांच्यात सतत वाद होत असल्याने वैष्णवी नाशिकला राहण्यासाठी आली होती. इथं तिची ओळख गोपाल नावाच्या अन्य एका तरुणाशी झाली होती. वैष्णवी ही नाशिकमध्ये काही दिवस गोपालच्या बहिणीसोबत राहत होती. त्यामुळे दोघांची ओळख झाली. याच ओळखीतून वैष्णवी आणि गोपाल यांच्या भावनिक नातं निर्माण झालं. दोघांनी लग्नाचा विचारही केला. याच दरम्यान, वैष्णवी दुसऱ्या तरुणाशी लग्न करणार असल्याची कुणकुण साहिलला लागली आणि तो प्रचंड संतापला. तो दोन ते तीन दिवसांपूर्वी नाशिकमध्ये आला होता. तो वैष्णवीला वारंवार फोन करून त्रास देत होता. तसेच तिला सोबत चलण्यासाठी गळ घालत होता. मात्र वैष्णवीला गोपालशी लग्न करायचं होतं. त्यामुळे तिने साहिलसोबत जाण्यास नकार दिला. याच कारणातून साहिलने वैष्णवीचा खून केल्याचा अंदाज आहे. वैष्णवीची हत्या केल्यानंतर काही तासांत साहिल देखील गळफास घेतलेल्या अवस्थेत आढळला.
