समता परिषदेच्या कार्यकर्त्यांची मागणी
नाशिक: महाराष्ट्राच्या राजकारणात लोकसभा निवडणुकांआधी अनेक भूकंप बघायला मिळाले. मात्र आता विधानसभा आधी सत्तेत असलेल्या महायुतीच्या गोटात भूकंप होण्याची चर्चा सुरू आहे. राष्ट्रवादी अजित पवार गटाचे जेष्ठ नेते छगन भुजबळ हे नाराज असल्याची चर्चा जोर धरू लागली आहे. अशातच आज मंत्री छगन भुजबळ यांच्या अध्यक्षतेखाली समता परिषदेची बैठक बोलावण्यात आली होती. मुंबईच्या वांद्रे येथील एमईटी सेंटर येथे ही बैठक पार पडली.पाच तास चाललेल्या या बैठकीत समता परिषदेच्या प्रमुख नेते व कार्यकर्त्यानी छगन भुजबळ यांच्याकडे वेगळा निर्णय घ्या, अशी मागणी करण्यात आल्याचे समजते.आपल्यावर अन्याय होत असल्याची भावना कार्यकर्त्यानी बोलून दाखवली,साहेब तुम्ही विचार करा आणि निर्णय घ्या,आपल्यासाठी सर्वच ठीक नाही त्यामुळे हीच ती वेळ आहे. अशी मागणीच समता परिषदेच्या नेत्यांनी व कार्यकर्त्यानी घेतल्या मुळे राजकीय वर्तुळात मंत्री छगन भुजबळ कोणता निर्णय घेतात यावर चर्चा सुरू आहे. दरम्यान लोकसभा निवडणुकीच्या वेळी नाशिक लोकसभा मतदारसंघासाठी स्वता अमित शहा यांनी छगन भुजबळ यांचे नाव उमेदवारीसाठी सुचवले होते मात्र शेवटपर्यंत एकमत होत नसल्याने भुजबळ यांनी संतापून आपण या उमेदवारीच्या स्पर्धेतून माघार घेत असल्याची घोषणा केली होती. त्यानंतर शिंदे गटाच्या हेमंत गोडसे यांना उमेदवारी जाहीर झाली. मात्र त्यावेळी देखील छगन भुजबळ हे प्रचारात सक्रिय नव्हते. यामुळे भुजबळ नाराज असल्याची चर्चा सुरू झाली. त्यानंतर काही दिवसांपूर्वी राज्यसभेच्या पोटनिवडणुकीसाठी छगन भुजबळ इच्छुक होते मात्र यावेळी देखील त्यांना राज्यसभेची संधी न मिळता ती सुनेत्रा पवार यांना मिळाली त्यामुळे छगन भुजबळ हे नाराज असल्याची चर्चा सुरू झाली आणि आज समता परिषदेच्या कार्यकर्त्यानी साहेब आता निर्णय घ्या असे म्हटल्याने भुजबळ यांच्या नाराजीला पृष्ठी मिळत असून भुजबळ वेगळा निर्णय घेणार का हे पाहणे महत्वाचे ठरणार आहे. यामुळे महायुतीला मोठा धक्का बसण्याची शक्यता राजकीय तज्ञांकडून व्यक्त होत आहे.
