ठाकरे गटाच्या शिवसेनेला धक्का बसण्याची शक्यता ?
नाशिक : काही दिवसांपूर्वी विवाह सोहळाच्या कार्यक्रमानंतर ठाकरे गटाच्या शिवसेनेत मोठे वादळ उठले होते त्यावेळी उपनेते सुधाकर बडगुजर यांची ठाकरे गटाच्या शिवसेनेने हकालपट्टी केली तर उपनेतेपदी दत्ता गायकवाड यांची नेमणूक करण्यात आली. मात्र काल पुन्हा झालेल्या विवाह सोहळ्यामुळे पुन्हा एकदा ठाकरे गटात वादळ उठण्याची चिन्हे निर्माण झाली आहेत. काही दिवसांपूर्वी ठाकरे गटाच्या शिवसेनेचे महानगरप्रमुख विलास शिंदे यांच्या मुलीच्या लग्नात उपस्थिती लावत शिंदेंच्या लग्नाला शिंदेंच येणार नाहीत तर कोण येणार ? असे सूचक विधान लग्नात करत उपमुख्यमंत्री एकनाथ शिंदे यांनी खळबळ उडवून दिली होती मात्र दुसऱ्याच दिवशी झालेल्या पत्रकार परिषदेत विलास शिंदे यांनी हजेरी लावत नाराज नसल्याचे सांगितले. मात्र काही दिवसांपूर्वी नाशिकचे सर्व नेते मातोश्रीवर भेटीसाठी गेले असता विलास शिंदे यांनी हजेरी लावली नव्हती याची राजकीय वर्तुळात जोरदार चर्चा असताना काल उपमुख्यमंत्री एकनाथ शिंदे हे अजय बोरस्ते यांच्या कुटूंबातील विवाहस्थळी जाण्यासाठी गंगापूर रोडने जात असताना ठाकरे गटाचे महानगरप्रमुख विलास शिंदे यांनी सोमेश्वर जवळ रस्त्यावर उपमुख्यमंत्री शिंदे यांचे वाहन थांबवून त्यांचे स्वागत केले. त्यामुळे उपमुख्यमंत्री एकनाथ शिंदे आणि ठाकरे गटाचे विलास शिंदे यांची अगदी थोड्या दिवसात झालेली दुसऱ्यांदा भेट याची राजकीय वर्तुळात चर्चा असून विलास शिंदे लवकरच शिंदे गटाच्या शिवसेनेत प्रवेश करण्याची शक्यता नाकारता येत नाही. त्याचबरोबर महानगरपालिकेच्या निवडणुका बघता शिंदे गट नाशिक शहरात आपली ताकद वाढविण्याचा प्रयत्न करत असल्याची चर्चा सुरू आहे.
