अजित पवार यांच्या विरोधात छगन भुजबळ बंडाचे निशाण फडकवणार का ?
नाशिक : मुख्यमंत्री देवेंद्र फडणवीस यांच्या नेतृत्वाखाली महायुती सरकार मंत्रिमंडळ विस्तार झाला यामध्ये अजित पवार गटाच्या राष्ट्रवादीच्या नऊ आमदारांनी मंत्रिपदाची शपथ घेतली मात्र यामध्ये कायमच अडचणीच्या काळातअजित पवारांना साथ देणारे राष्ट्रवादीचे वरिष्ठ नेते छगन भुजबळ यांना मंत्रीपदापासून लांब ठेवत त्यांचा पत्ता कट करण्यात आल्याने छगन भुजबळ हे कमालीचे नाराज झाल्याचे चित्र असून माध्यमांबरोबर संवाद साधताना भुजबळ म्हणाले जहाँ नहीं चैना, वहाँ नहीं रहना, असे त्यांनी म्हटल्यावर भुजबळ यांनी अजित पवार यांच्याविरोधात बंडाचा झेंडा उभारता का ? याबाबत राजकीय वर्तुळात तर्क वितर्क लढवले जात आहेत.
छगन भुजबळ यांनी आज माध्यमांशी संवाद साधला. यावेळी ते म्हणाले मंत्रिमंडळातून मला का काढलं याबाबत मला माहिती नाही. मात्र काही दिवसांपूर्वी माझं वरिष्ठांशी बोलणं झालं होतं. त्यावेळी तुम्हाला राज्यसभेवर जायचं असेल तर आम्ही तुम्हाला राज्यसभेवर पाठवू, असे म्हटले. मी त्यांना म्हणालो, जेव्हा मला राज्यसभेवर जायचं होतं तेव्हा तुम्ही मला ती संधी दिली नाही. तेव्हा तुम्ही मला सांगितलं की विधानसभेची निवडणूक लढवा. तेव्हा तुम्हाला येवल्यातून लढलं पाहिजे, असं सांगण्यात आले. तुम्ही लढाईत असला तर पार्टी जोमानं पुढं जाईल, असं सांगितलं गेलं. माझ्या येवला-लासलगाव मतदारसंघातील मतदारांच्या आशीर्वादाने मी निवडून आलो. राज्यसभेवर ताबडतोब जाऊ शकत नाही. त्यासाठी लगेच मला राजीनामा दयावा लागेल मगच मी राज्यसभेवर जाऊ शकतो मात्र ही माझ्या मतदारसंघाच्या मतदारांबरोबर ती प्रतारणा ठरेल. येवल्याच्या मतदारांचा विश्वासघात ठरेल. मला ज्यांनी प्रेम दिलं त्यांच्याशी मी प्रतारणा करणार नाही, असेही भुजबळ म्हणाले.त्याचबरोबर मी सामान्य कार्यकर्ता आहे, मला डावललं काय आणि फेकलं काय, काय फरक पडतो. मंत्रिपदं आली- गेली…भुजबळ कधी संपला नाही, असंही ते म्हणाले. ओबीसींच्या लढ्यामुळेच महायुतीला मोठं यश मिळालं.असेही ते म्हणाले तसेच अजित पवारांशी मी चर्चा केली नाही आणि मला तशी गरजही वाटली नाही, असंही छगन भुजबळ यांनी सांगितले. आता पुढची भूमिका काय असेल? असे पत्रकारांनी विचारले असता “आता बघू… जहाँ नहीं चैना, वहाँ नहीं रहना”, असे सूचक वक्तव्य छगन भुजबळांनी केले. त्यामुळे ते बंडाचा झेंडा उभारणार का अथवा राष्ट्रवादी पक्षात राहून संघर्ष करणार याकडे संपूर्ण महाराष्ट्राचे लक्ष लागून आहे.
