कागदोपत्री गटार दाखवत 20 लाख 67 हजार रुपयांचा अपहार
नाशिक : मकरंद अनासपुरे यांचा “जाऊ तिथे खाऊ” या चित्रपटात विहीर चोरीची घटना दाखवण्यात आली होती. मुख्य म्हणजे हा चित्रपट नागरिकांच्या पसंतीस मोठ्या प्रमाणात उतरला होता.यातील कथा आपल्याला काल्पनिक वाटत असेल मात्र अश्या घटना घडल्या आहेत याउपर चक्क मालेगाव मध्ये गटार चोरीची देखील घटना काही वर्षांपूर्वी घडली होती. मात्र ती चोरी आत्ता उघडकीस आली आहे हे विशेष, मिळालेल्या माहितीनुसार सांडपाण्याचा निचरा करण्यासाठी मालेगावच्या कॉलनी परिसरात फक्त आणि फक्त कागदोपत्री गटार दाखवीत ठेकेदाराच्या संगमताने काही अधिकाऱ्यांनी मिळून तब्बल 20 लाख 67 हजार 607 रुपयांचा अपहार केल्याचे प्रकरण काही दिवसांपूर्वी उघड झाले . मालेगावच्या 60 फुटीरोडवरील स्टेट बँक भागात गटारीच्या कामासाठी सोहेल अब्दुल रहेमान मासुमअली यांना सन 2012 मध्ये 49 लाख रुपयांचा ठेका देण्यात आला होता. मात्र ठेकेदार महापालिकेचे अधिकारी यांनी संगमत करत प्रत्यक्ष कामावर खर्च न करता अन्य ठिकाणांच्या गटारीचे काम दाखवत यामधून 20 लाख 67 हजार 607 रुपयांचा अपहार केला होता. माहिती अधिकार कार्यकर्ते तुषार पाटील यांनी मुंबईच्या लाचलुचपत प्रतिबंधक विभागाकडे यासंदर्भात तक्रार दाखल केली. यादरम्यान कोरोना काळात दोन वर्षे चौकशीचा वेग थंड झाला होता. त्यानंतर या प्रकरणाच्या चौकशीसाठी सार्वजनिक बांधकाम विभागाच्या दक्षता व गुण नियंत्रण विभागाला या घटनेच्या चौकशीचे आदेश देण्यात आले होते. यासाठी लागणारे शासन शुल्क अडीच लाख रुपये भरण्याचे आदेश मालेगाव महापालिकेला देण्यात आले होते. त्यानुसार दक्षता व गुण नियंत्रण विभागाच्या अधिकाऱ्यांनी 2022 मध्ये मालेगावी येत गटाराची पहाणी केली असता तक्रारदार तुषार पाटील यांनी दाखविलेल्या ठिकाणी गटार दिसून आली नाही. त्यानंतर महापालिकेत कार्यरत असलेल्या आजी-माजी अधिकारी म्हणजेच उपायुक्त, अभियंता, अधिकारी, लिपिक, लेखाधिकारी अशा पंधराजणांनी 2012 मध्ये आपल्या पदाचा व अधिकारांचा दुरुपयोग करीत भ्रष्टाचार केल्याप्रकरणी लाचलुचपत प्रतिबंधक विभागाचे पोलिस निरीक्षक नितीन पाटील यांच्या फिर्यादीवरून छावणी पोलीस ठाण्यात गुन्हा दाखल करण्यात आला आहे.
